Azərbaycan “Avroviziya 2008”in finalında

Elnur və Samirin çıxışı "Belqrad Arena "nı ayağa qaldırdı

Bakı vaxtı ilə 24.00-da bütün ölkənin ürəyi Belqradla döyünməyə başladı. "Avroviziya2008" Azərbaycan ilk debüt çıxışı ilə Avropa tamaşaçısına özünü tanıtmalı və "mən də varam" deməli idi. İlk 6 çıxış olduqca sakit qarşılandı. Heç bir şoudan əsər əlamət olmadığını da nəzərə alıb, bir anlıq artıq qələbəmizə ümid çalarları parlamağa başladı. Nəhayət, saat 00.30-a yaxınlaşdığı an 7 nömrə altında çıxış edən Azərbaycan cütlüyü Elnur və Samir dueti öz parlaq şousu ilə səhnəni ələ aldı. "Azərbaycanlı nümayəndələrin Avraviziya ailəsinə qədəmləri uğurla basıldı", - demək yerinə düşərdi. Zalda heç bir reaksiya oyatmayan 6 sakit çıxışdan sonra ətalətin necə pozulduğunun bütün ölkə şahidi oldu. Zalın yarısı iştirakçılarımızı ayaq üstündə gur alqışlara qərq etdi. "Dey after dey" ölkəmizin finala vəsiqəsi oldu. Onu da qeyd edək ki, bu il yarışmaya rekord sayda - 43 ölkə qatılıb. İkinci yarım final isə mayın 22-də finalın digər yarışmaçılarını bəlli edəcək. Son akkordlarsa Serbiya paytaxtında mayın 24-də vurulacaq. Festivalı 15 min qonaq izləyir. Qeyd edək ki, yarışmaya bütün biletlər 2 ay əvvəldən satılıb, bütün mehmanxana və otellərin qiyməti isə 100 % artırılıb.
İkinci yarımfinalın favoritləri sırasına Türkiyə, Ukrayna və İsveç liderlik edir. Müsabiqənin gedişatını isə 2,5 min jurnalist izləyir.
Artıq birinci yarımfinalda finala vəsiqə qazanan iştirakçılar arasında ən şanslılarının adları hallandırılır. Bu siyahıda Rusiya, Yunanıstan, Finlandiyanın "Terasbetoni "rok qrupu, əla debüt çıxışı göstərən Elnur və Samir dueti, Siruşo öndə gedir.
Amma unutmayaq ki, 2-ci yarımfinal güclülər qrupu sayılır və Azərbaycanın Ukraynalı Ani Lorak, Beloruslu Ruslan Alexno və finala birbaşa vəsiqə qazanan İngiltərə, Fransa, İspaniya, Almaniya kimi rəqibləri var. Final axşamı 25 iştirakçı ölkədən kimin qalib olacağına dair proqnozlar verməksə olduqca çətindir. Çünki deyildiyi kimi "Avroviziya" surprizlər yarışmasıdır.

Xalq cəbhəsi.- 2008.- 22 may.- S. 10.