Azərbaycan
Respublikasının Prezidenti İlham Əliyev və Heydər
Əliyev Fondunun prezidenti, YUNESKO-nun və İSESKO-nun
xoşməramlı səfiri, Milli Məclisin deputatı
Mehriban Əliyeva mayın 26-da Azərbaycan Dövlət Rus
Dram Teatrı binasının bərpa və yenidənqurma
işlərindən sonra açılış
mərasimində iştirak etmişlər.
Prezident İlham
Əliyev teatrın binasının bərpa və
yenidənqurmadan əvvəlki və indiki
görünüşünü əks etdirən
şəkillərə baxdı. Sonra teatrın
açılışını bildirən qırmızı
lenti kəsdi.
Dövlətimizin
başçısına məlumat verildi ki, ölkəmizin
teatr tarixində özünəməxsus yer tutan Azərbaycan
Dövlət Rus Dram Teatrının binasında bərpa və
yenidənqurma işlərinə 2006-cı ilin oktyabrında
başlanılmışdı. Əsaslı
bərpa işləri ilə yanaşı, binada ən
müasir avadanlıq da quraşdırılıb və bunlar
ən yüksək standartlar səviyyəsindədir.
Əvvəllər 40-dək projektorla təchiz
edilmiş səhnə-işıq sistemi hazırda müasir
tipli 147 ədəd profil, səpələyici, linzalı
və izləyici projektorlarla, eləcə də xüsusi
işıq effektləri verən 10 ədəd
fırlanan başlıqla təchiz edilmişdir. Sistem müasir
səviyyəli pult vasitəsilə idarə olunacaqdır.
Səsgücləndirmə sistemi də dünyanın ən
müasir standartlarına cavab verir.
Bildirildi ki, tamaşa
salonunun çilçırağı, kresloları yeniləri
ilə əvəz olunub, qrim və iş otaqları müvafiq
mebel və inventarlarla təchiz edilib, teatrın inzibati və
yaradıcı heyəti üçün yüksək
səviyyəli iş şəraiti yaradılıbdır. Binada
müasir tələblərə cavab verən
mərkəzləşdirilmiş kondisioner-ventilyasiya və
istilik sistemləri, o cümlədən
təhlükəsizlik, yanğın və fövqəladə
hallarda xəbərvermə sistemləri
quraşdırılmışdır. Binanın fasadına
yüksək keyfiyyətli materiallardan üzlük
çəkilmiş, xüsusi gecə
işıqlandırıcıları
quraşdırılmışdır.
Teatrda aparılan
əsaslı bərpa və yenidənqurma işləri ilə
tanışlıqdan sonra Prezident İlham Əliyev baş rejissor,
xalq artisti Aleksandr Şarovski ilə görüşdü, ona
Azərbaycanın yüksək dövlət
mükafatlarından olan “Şöhrət” ordenini təqdim
etdi.
Prezident İlham
Əliyev A.Şarovskini təbrik edərək dedi:
- Hörmətli Aleksandr
Yakovleviç, teatrın açılışı
münasibətilə sizi təbrik edirəm. Bu,
teatrın yeni həyatı deməkdir. Bildiyiniz kimi, mən
sizi “Şöhrət” ordeni ilə təltif etmişəm. Bu,
ilin əvvəlində olmuşdur, lakin həmin ordeni sizə
təqdim etməyə imkan yox idi. Bu, Azərbaycan
dövlətinin yüksək mükafatını sizə
təqdim etmək üçün ən yaxşı
fürsətdir. Sizi təbrik edirəm.
Aleksandr Şarovski:
Hörmətli cənab Prezident, hörmətli Mehriban
xanım! Bu gün mənim həyatımda ən
əsas, ən mühüm, ən həyəcanlı gün
olduğunu deməyə ehtiyac yoxdur. Mən bu ordeni sonsuz
hörmət bəslədiyim Prezidentin, doğulduğum və
bütün həyatım boyu yaşadığım,
çox sevdiyim ölkənin Prezidentinin əlindən
qəbul etdim. Bu, mənim üçün çox böyük
şərəf, çox böyük fəxrdir, hisslərim
aşıb-daşır, hətta danışmağa da bir
qədər çətinlik çəkirəm. Siz olduqca
səxavətlisiniz, Siz mənə və həmkarlarıma
teatrı bəxş etdiniz. Bu, teatr deyil, bizim arzumuzdur.
Buna görə də,
möhtərəm cənab Prezident, - bu barədə bir
neçə ay əvvəl yazmışdıq, - biz bir
tamaşa hazırlayırıq. Tamaşa elə belə
də adlanır: “Arzular çin olur”. Bu tamaşa Sizə,
bugünkü günə həsr edilmişdir.
Sizdən çox
xahiş edirəm, vaxt tapsanız, sentyabrın 15-də
hörmətli Mehriban xanımla birlikdə bizim teatra
təşrif gətirin. Biz çox
istərdik ki, bu tamaşanı Sizə göstərək,
çünki Siz bu qədər nəhəng işlər
görürsünüz, böyük Heydər Əlirza
oğlunun işini davam etdirirsiniz, çoxsaylı
körpülər, yollar, zavodlar, elektrik stansiyaları ilə
yanaşı, Siz vaxt tapıb bizə bu teatrı da
tikdiniz. Bu, misilsiz işdir, mən deməyə söz
tapmıram.
Mən böyük
vəcdlə, böyük sevinclə deyə bilərəm ki,
qarşıdakı seçkilərdə Rus Dram Teatrı
İlham Əliyevə səs verəcəkdir.
İlham Əliyev: Bu
sözlərə görə çox sağ olun. Mən
çox şadam ki, iki il bundan əvvəl
planlaşdırdığımız və
başladığımız işin bəhrəsini bu gün
gördüm. Əslində, burada yeni teatr tikilmişdir. Siz
bütün tikinti müddətində burada olmusunuz, mən
də buraya gəlirdim. Əslində burada yalnız divarlar
qalmışdı, onlar da tamam
çürümüşdü. Azərbaycanda, Bakıda yeni
Rus Dram Teatrı böyük hadisədir. Teatr həm
özünün xarici görkəminə görə, həm
də avadanlığına görə fərqlənir.
Buradakı avadanlıqla, texnika ilə, müasir qurğularla
tanış olandan sonra bunu yəqin etmək çətin
deyildir. Bütün bunlar çox vacibdir. Bu, yollardan, körpülərdən,
elektrik stansiyalarından heç də az əhəmiyyətli
deyildir. Bu, mədəniyyətdir, mənəvi həyatdır.
Azərbaycan dolğun həyat sürür,
hərtərəfli inkişaf edir. Buna görə də bizim
həyatımızın bütün cəhətləri,
xüsusən mənəviyyatla bağlı
cəhətlər bir Prezident kimi, mənim üçün
çox vacibdir. Rus Dram Teatrı, əslində,
təzədən yaradılmış ilk teatrlardan biridir. Siz
bilirsiniz, bizim bütün teatrların yenidən qurulması
proqramımız var. Biz ən kiçik teatrlardan -
əvvəlcə Kukla Teatrından başladıq. O da
Bakının ən gözəl tarixi binalarından birində
yerləşir. Sonra növbədə Rus Dram Teatrı idi. Rus
mədəniyyətinə, rus dilinə münasibət,
bütövlükdə bugünkü Azərbaycanın ruhu,
bütün millətlərin, bütün xalqların,
bütün dinlərin nümayəndələrinin bir
ailə kimi yaşaması bizim fəxrimizdir. Hesab
edirəm, müasir Azərbaycanın ən böyük nailiyyətlərindən
biri ondan ibarətdir ki, burada bütün millətlərin
nümayəndələri öz doğma diyarında
yaşayırlar, onlar öz ölkəsinin vətənpərvərləridir
və müasir Azərbaycanın malik olduğu hər
şeydən istifadə edirlər.
Mən sizi
təbrik edirəm. Hələ teatrın kollektivi ilə
də görüşəcək və onları da təbrik
edəcəyəm. Sizə uğurlar, uzun ömür,
fəallıq, gümrahlıq arzulayıram. Arzu edirəm ki,
yeni tamaşalarla bizi sevindirəsiniz. Mən isə sizin yeni
tamaşa hazır olan kimi, məmnuniyyətlə ona baxmağa
gələcəyəm.
Sonra teatrın
yaradıcı kollektivi ilə görüşən Prezident İlham
Əliyev onlara müraciətlə dedi:
- Əziz dostlar, Rus Dram
Teatrının, əslində, yeni binasının
açılışı münasibətilə mən sizin
hamınızı təbrik edirəm. Bu teatrın nə
vəziyyətdə olmasını biz hamımız
yaxşı xatırlayırıq. Biz təmirə başlayan
kimi hamımız başa düşdük ki, burada bircə
normal divar da yoxdur, binanın damı da daxil olmaqla, hər
şeyi təzələmək lazımdır. Buna
görə də işlərin əvvəlcə
nəzərdə tutulan həcmi, əlbəttə, artdı.
Lakin bu bizi dayandırmadı, işi axıra
çatdırmağımıza mane olmadı. Bərpa
işlərinin və əslində, teatrın tikintisinin
başlanmasından ötən iki ildən də az vaxt sonra,
bu gün ölkəmizin, müstəqil
Azərbaycanın həyatında əlamətdar
gündür. Əslində, yeni teatr tikilmişdir, bu teatr
ən yüksək standartlara uyğundur. Hər şey -
istər texniki cəhət, istər avadanlıqlar, istər
artistlər üçün otaqlar ən yüksək
səviyyədədir. Bizim çox dinamik inkişaf edən
ölkəmizdə belə də olmalıdır.
Bu gün
həyatımızın bütün sahələri məhz
dinamizmi, səmərəliliyi ilə, yüksək
peşəkarlıq və yüksək standartlarla
səciyyələnir. Azərbaycanda görülən
bütün işlər ən yüksək
səviyyədə olmalıdır. Mən
əminəm ki, şəhər infrastrukturunun iqtisadiyyatla
bağlı olmayan mühüm obyektləri ilə
yanaşı, biz ölkəmizin, xalqımızın
mənəvi həyatını da yüksəltməliyik, buna
həmişə xüsusi diqqət, xüsusi qayğı
göstərilməlidir. Həyatlarını
incəsənətə, yaradıcılığa həsr
etmiş insanlar daim dövlət tərəfindən
qayğı hiss etməlidirlər. O cümlədən iş üçün,
yaradıcılıq üçün də ən
əlverişli şərait olmalıdır.
İndi Azərbaycanda,
Bakıda və başqa şəhərlərdə
mədəniyyət sahəsinin inkişafına böyük
diqqət yetirilir. Bizim Bakı şəhərinin
bütün teatrlarının yenidən qurulması
üçün proqramımız var. Bu gün mən Aleksandr
Yakovleviçə yüksək mükafatı təqdim
edərkən dediyim kimi, biz ən kiçik teatrlardan -
əvvəlcə Kukla Teatrından başladıq. Rus Dram
Teatrı ikinci oldu. İndi bizim planımızda Gənc
Tamaşaçılar Teatrını, əslində təzədən
tikmək durur. Sonra Azərbaycan Milli Dram Teatrının
növbəsidir, onun bərpasına yəqin ki, payızda
başlayacağıq. Daha sonra Opera və Balet Teatrı
gəlir. Orada biz, sadəcə, ona görə hələ
işə başlamamışıq ki, Heydər Əliyev
adına Saray təmirdədir, yayda onun təmiri başa
çatandan dərhal sonra bu teatrın yenidən qurulması
işləri başlanacaqdır.
Bununla yanaşı, bildiyiniz
kimi, tezliklə Muğam Mərkəzi - nadir memarlıq
nümunəsi istifadəyə veriləcək və
Azərbaycan xalqının milli muğam sənəti onun
inkişafına dövlət qayğısı
baxımından layiqli qiymətini alacaqdır. Muğam
Mərkəzinin yanında Xalça Muzeyi tikiləcəkdir.
Bu da nadir memarlıq nümunəsidir, dəqiq deyə
bilərəm ki, dünyada ikinci bu cür bina yoxdur. Muzey
Mərkəzinin yenidən qurulması indi, əslində,
başa çatır. Bu, keçmiş Lenin Muzeyidir. Tarix
Muzeyi açılmış və əslində
özünün ilkin görkəmində bərpa
edilmişdir, həm Tarix Muzeyinin özü kimi, həm də
Zeynalabdin Tağıyevin tikdiyi ev kimi bu, çox vacibdir.
Ədəbiyyat Muzeyində təmir işləri başa
çatmağa yaxınlaşır.
Ümumiyyətlə,
şəhərdə bütün mədəniyyət
ocaqları, istirahət yerləri qaydaya salınır. Ən başlıcası isə, onlar hamısı
yüksək standartlara uyğundur, çünki Azərbaycan
vətəndaşları yaşamaq, istirahət
üçün layiqli şəraitə malik
olmalıdırlar. Bu baxımdan bugünkü gün
ölkəmiz üçün, Azərbaycanda yaşayan
hər bir xalqın ənənələri,
mədəniyyəti, tarixi və dini eyni
dərəcədə əziz olan müstəqil Azərbaycan
dövləti üçün çox səciyyəvidir.
Milliyyətindən, dini etiqadından asılı olmayaraq,
Azərbaycanın bütün vətəndaşları,
bərabər hüquqlara malikdirlər, hamıya
münasibət eynidir. Belə də olmalıdır.
Əlbəttə, bu, Konstitusiyada yazılmışdır.
Praktik olaraq, hər bir ölkənin Konstitusiyasında bu
cür bəndlər var. Lakin biri var Konstitusiyada olsun, biri
də var həyatda. Mən çox şadam ki,
Azərbaycanda müstəqillik illərində, sözün
yaxşı mənasında, əməkdaşlıq və
beynəlmiləlçilik ruhu qorunub saxlanır,
möhkəmlənir və hesab edirəm ki, hamı – bizim
ölkəmiz kimi çoxmillətli olan sizin truppa da bunu hiss
edir.
Mən sizə
uğurlar arzulayıram, bu gün sizi görməyimə
çox şadam. Mən bilirdim ki, bütün
işlər yüksək səviyyədə
görüləcəkdir, lakin gördüklərim gözlədiklərimdən
də artıqdır. Yəni burada yaradıcılıq
üçün, işləmək üçün
yaxşı şərait var. Adam buraya daxil olanda əhvalı
yaxşılaşır. Mən sizə yaradıcılıq
uğurları, yeni tamaşalar arzulayır və ən xoş
diləklərimi bildirirəm.
Yaradıcı kollektivin
üzvləri Prezident İlham Əliyev və xanımı
Mehriban Əliyeva ilə xatirə şəkli
çəkdirdilər.
Xalq qəzeti.- 2008.- 27 may.- S. 1.