Azərbaycan Dövlət Gənc Tamaşaçılar Teatrı növbəti qastroldan qayıdıb

Moskva hökuməti və Moskva Vilayəti Mədəniyyət Nazirliyinin 2007-2010-cu illəri əhatə edən müvafiq qərarları və xaricdə yaşayan soydaşlara kömək Dövlət proqramına uyğun olaraq Moskva Vilayəti Mədəniyyət Nazirliyinin dəvəti ilə Rusiyaya qastrola getmiş ADGTT-i bu günlərdə Bakıya qayıdıb.

Səfərdə kollektiv Dmitrov, Taldon, Dubna şəhərlərində rejissor Nicat Kazımovun quruluşunda rus bölməsinin məktəbliləri üçün nəzərdə tutulmuş Samuil Marşakın "Koşkin dom" (Pişiyin evi) və rejissor, xalq artisti Vaqif Əsədovun səhnələşdirdiyi böyüklər üçün Azərbaycanın görkəmli dramaturqu İlyas Əfəndiyevin "Sojjennıye dnevniki" (Məhv olmuş gündəliklər) tamaşalarını təqdim edib.

Tamaşalarda hər üç şəhərin rəhbərliyi, KİV-in və Rusiya teatr ictimaiyyətinin nümayəndələri iştirak edərək, Azərbaycan teatr sənətini yüksək qiymətləndirmişlər. Qastrolun sonuncu günü Dubna şəhərində verilən tamaşada Moskva vilayətinin mədəniyyət naziri Qalina Ratnikova və digər rəsmi nümayəndələr iştirak edərək aktyorlarımızın oyunlarından xüsusi razılıqlarını bildirib, bu layihənin reallaşdırılmasına şərait yaratdıqları üçün Azərbaycan Mədəniyyət və Turizm Nazirliyinə və ADGTT-in rəhbərliyinə təşəkkürlərini çatdırıblar.

Bu ilin payızında Moskva hökuməti və Moskva Vilayəti Mədəniyyət Nazirliyinin təşkilatçılığı ilə keçiriləcək "Uğurlu yollar" (Doroqami dobra) III Beynəlxalq Teatr Festivalına Azərbaycan Dövlət Gənc Tamaşaçılar Teatrı yenidən dəvət alıb.

Tamaşalarda əsas obrazları yaradan Nelli Həsənova, İnna İmranova, Yelena Şetinkina, Günel Məmmədova, Nicat Kazımov, Elşən Rüstəmov, Yaqub Zeynalov, Rasim Cəfərov, Cavad Cabbarlı, Aleksey Saprıkinin çıxışları rusiyalı teatrsevərlər tərəfindən dəfələrlə alqışlarla qarşılanıb.

Yeni Azərbaycan.- 2008.- 24 may.- S. 11.