Gəncə Dövlət Dram
Teatrında Kişi və Qadına ictimai baxış olub
Mayın 20-də zəngin ənənələrə
malik Gəncə Dövlət Dram Teatrında
görkəmli yazıçı-dramaturq
Əli Əmirlinin
"Kişi və Qadın" tamaşasına
ictimai baxış keçirildi. İctimai baxışda Gəncə
ziyalıları, şəhərin
sənət və mədəniyyət adamları,
eləcə də teatrsevərlər iştirak edirdilər. Tamaşaya teatrın rejissoru, əməkdar incəsənət xadimi Vaqif Şərifov quruluş verib. Beş personaj üzərində qurulmuş
tamaşada teatrın aparıcı aktyorlarından
xalq artisti Pərvanə Qurbanova (Emma), əməkdar artist Ramiz Vəliyev
(Cəmil), gənc aktyor İlham Hüseynov (Əvəz), gənc aktrisalar Şəfa Qədirova və Kəmalə Məmmədova rol alıblar. Tamaşanın
bədii tərtibatı
Vahab Cəfərovun işidir.
Bütün zamanlar üçün
aktual sayılan kişi və qadın münasibətlərindən,
onların qarşılıqlı
məhəbbətindən, bu məhəbbət fonunda əksər hallarda qaçılmaz olan ailə münaqişələrindən, sədaqət və xəyanət məsələlərindən
bəhs edən səhnə əsəri maraqlı, gözlənilməz hadisələr,
komik, dramatik, bəzən də ironik vəziyyətlərlə
zəngindir. Pyesdə təqdim edilən
mənəvi-əxlaqi
problemin rejissor tərəfindən uğurlu
həlli və quruluşdakı yüksək
səhnə mədəniyyəti,
peşəkarcasına işlənmiş
dəqiq mizanlar, tamaşa boyu səslənən musiqi teatrsevərlər tərəfindən
razılıqla qarşılandı.
Pyesin müəllifi
Əli Əmirli ilə söhbətimiz zamanı tamaşanın ictimai baxışından
aldığı təəssüratla
maraqlandıq. "Kişi və Qadın"ın Gəncə Dövlət Dram Teatrında tamaşaya qoyulan ilk əsəri olduğunu bildirən müəllif həmişə
bu teatrla işləməyi, belə
maraqlı kollektivlə
işbirliyi qurmağı
arzuladığını vurğuladı.
İlk təşəbbüsün
teatrın rejissoru Vaqif Şərifovdan gəlib. Ə.Əmirli təklifə məmnuniyyətlə
razılıq verib:
"Mayın 16-da Vaqif
Şərifov mənə
telefon açıb premyeraya dəvət edəndə təəccüblənməkdən
daha çox, sevindim. Tamaşaya qoyulan əsərimin "Kişi və Qadın" olduğunu biləndə isə sevincim ikiqat artdı. Çünki bu pyes xüsusilə
çox sevdiyim əsərlərimdəndir". Sözügedən əsərin ilk
dəfə Dövlət
Gənclər Teatrında
mərhum rejissor Hüseynağa Atakişiyevin
quruluşunda səhnəyə
çıxdığını deyən Ə.Əmirli Gəncə Dövlət Dram Teatrında tamaşaya baxdıqdan sonra apardığı müqayisənin
nəticələrinin ürəkaçan
olduğunu bildirdi: "Doğrusu, qorxum vardı. Amma elə ilk
epizoddan sonra tamaşaya məmnuniyyətlə
baxmağa başladım.
Rejissorun savadlı, səliqəli işindən,
əsərə yeni məzmun gətirən yozumundan çox razı qaldım. Tamaşanın mədəni
səviyyəsi diqqəti
xüsusən cəlb
edirdi". Aktyorların yaradıcı işini
ayrıca qeyd edən müəllif Pərvanə Qurbanovanın,
İlham Hüseynovun,
Ramiz Vəliyevin geniş aktyorluq imkanlarına malik sənətkar olduqlarını,
gənc aktyorların da oyunundan razı
qaldığını dilə
gətirdi. Ə.Əmirli Gəncə Teatrı ilə bundan sonra da
əməkdaşlıq edəcəyini,
məşhur "Əli
və Nino"nun motivləri əsasında işlədiyi
eyniadlı pyesi də sözügedən teatra verəcəyini açıqladı.
525-ci qəzet.- 2008.- 24
may.- S. 32.