Bu gün mərhum xalq artisti Kamal Xudaverdiyevin 70 illiyi tamam olur

Mərhum aktyor, Azərbaycanın xalq artisti Kamal Xudaverdiyev, yaşasaydı, bu gün özünün 70 yaşını qeyd edəcəkdi. On gün əvvəl dünyasını dəyişən K.Xudaverdiyev haqqında keçmiş zamanda danışmaq sənət dostlarına ağır gəlir. Xalq artisti Bəsti Cəfərova bu hadisənin baş verdiyinə hələ də inanmadığını söyləyir: "Elə bilirəm ki, o sağdır. İnana bilmirəm ki, yaxın zamanlaradək tərəf-müqabilim olan bir insan indi həyatda yoxdur. Kamal Xudaverdiyev teatra məşqləri olmayan zaman gəlib-gedəndə darıxırdı. Amma o bir əsərlə məşğul olanda, yeni rol alanda, tamam başqa bir adama çevrilirdi. Elə bil ömrünə yeni məna verilirdi".
Rejissor Bəhram Osmanov isə deyir ki, hələ onun oynamadığı maraqlı rolları qarşıda idi: "Elə rollar var ki, aktyor gərək ömrünün kamil çağında oynasın. Kamal Xudaverdiyevin də yaşı, xarici siması ona çox rollarda oynamaq imkanı yarada bilərdi. Təəssüf ki, əcəl buna imkan vermədi".
Xatırladaq ki, K.Xudaverdiyev "Kral Lir"də Kral Lir, "Şah Edib"də Şah Edib, "Mesenat"da Murtuza Muxtarov, "Xurşudbanu Natəvan"da Qoca kimi rolların ifaçısı olub. Demək olar ki, əksər hallarda baş və aparıcı rollar oynayan mərhum aktyor 70 illik ömrünün 40 ilini sənətə həsr edib. O, Azərbaycan kinosunda da yaddaqalan obrazlar yaradıb. "İstintaq davam edir"də Çingizov, "Dağlarda döyüş" filmində Rüstəmov, "Sonuncu məhəbbət"də Həsənov obrazları ilə yaddaqalan aktyor haqqında əməkdar artist Hicran Nəsirova da xatirələrini bölüşür: "Azərbaycanın mükəmməl bir sənət fədaisini itirdik. Aktyor sözü kiçik hərflə yazılır. Amma Kamal müəllim haqqında danışanda gərək bu söz böyük hərflərlə yazılsın".

525-ci qəzet.- 2008.- 3 may.- S. 24.