Opera və Balet Teatrının səhnəsində “Qu gölü” baleti

Paytaxtımızın qonağı Anna Doroş Avropanın mötəbər səhnələrində uğurla çıxış edir

Azərbaycan Dövlət Opera və Balet Teatrının səhnəsində klassik balet sənətinin ən dəyərli nümayəndələrindən biri - P.Çaykovskinin "Qu gölü" baletinin tamaşası oynanılacaq.
Teatrın mətbuat xidmətindən aldığımız məlumata əsasən, mayın 24-də baş tutacaq tamaşada sənətsevərləri maraqlı bir sürpriz gözləyir. Belə ki, onlar "Qu gölü" baletinin qəhrəmanları Odetta-Odilliya və Şahzadə Ziqfrid rollarında dünya baletinin ulduzları - Anna Doroş və Yan Voynanın ifası ilə tanış olacaqlar.
Xatırladım ki, A.Doroş Ukraynanın xalq artisti, Ukrayna Dövlət Akademik Opera və Balet Teatrının solistidir. Bununla yanaşı, o, Avropanın ən mötəbər opera və balet teatrlarının səhnələrində uğurla çıxış edir. A.Doroş balet artistlərinin bir çox beynəlxalq müsabiqələrinin iştirakçısı və dörd müsabiqənin "Qran-pri" mükafatı və qızıl medalının sahibidir. O, həmçinin, Almaniya, Avstriya, İtaliya, Yaponiya, Fransa və ABŞ-da keçirilən klassik balet festivallarının çoxsaylı fəxri mükafatlarına layiq görülüb.
Bu, ukraynalı balet ulduzunun bakılı baletsevərləri ilə ilk görüşü deyil. O, ötən illərdə də iki dəfə şəhərimizdə qonaq olub və "Qu gölü" tamaşasında parlaq çıxışı ilə tamaşaçıları heyran edib. Balet truppamızın imkanlarına artıq bələd olan və sənətçilərimizin peşəkar səviyyəsini yüksək qiymətləndirən A.Doroş Azərbaycan balet ustaları ilə birlikdə çıxış etməyin ona böyük zövq verdiyini, teatr rəhbərliyinin qonaqpərvərliyini vurğulayıb və budəfəki dəvəti də böyük məmnuniyyətlə qəbul edib.
Tamaşada A.Doroşun tərəf-müqabili - Şahzadə Ziqfrid rolunu isə çexiyalı balet ulduzu, Praqa Opera və Balet Teatrının solisti, balet artistlərinin beynəlxalq müsabiqələrinin laureatı Y.Voyna ifa edəcək.
"Qu gölü" baletinin tamaşasında, həmçinin, Azərbaycan Opera və Balet Teatrı balet truppasının solistləri, əməkdar artistlər Gülağa Mirzəyev, Rimma İsgəndərova, Kamilla Hüseynova, Yuri Lobaçov, Yelena Skomoroşenko, aparıcı solist Samir Səmədov da çıxış edəcəklər. Tamaşanı xalq artisti, dirijor Cavanşir Cəfərov idarə edəcək.

Səs.- 2008.- 15 may.- S. 12.