Mükərrəmoğlu M.

Azərbaycan Xalq Cümhuriyyətinin 90 illik yubileyinə həsr olunmuş elmi konfrans

Mədəniyyət və Turizm Nazirliyi və Milli Elmlər Akademiyası Şərqdə ilk demokratik respublika olan Azərbaycan Xalq Cümhuriyyətinin 90 illik yubileyinə həsr olunmuş birgə elmi konfrans keçirdilər. Konfransı giriş sözü ilə AMEA-nın prezidenti M.Kərimov açdı.
O, qeyd etdi ki, Şərqdə ilk demokratik respublika olan Azərbaycan Xalq Cümhuriyyətinin yaradılması tariximizin parlaq və şanlı səhifələrini təşkil edir. Sonra çıxış üçün söz mədəniyyət və turizm naziri Ə.Qarayevə verildi. Nazir qeyd etdi ki, Azərbaycan xalqının tarix boyu apardığı azadlıq, istiqlaliyyət mübarizəsi 1918-ci ildə öz bəhrəsini vermiş, Azərbaycan xalqı müstəqil dövlətini yaratmışdır. Zamanın axarında özünün dövlətçilik ənənələrini qoruyub saxlayan Azərbaycanın vətənpərvər və qeyrətli övladları yetişmiş şəraitdən istifadə edərək xalqımızın tarixi haqqını qaytarmaq təşəbbüsünü irəli sürdülər. Tarix göstərdi ki, xalqın vətənpərvər oğulları zamanın axarından baş çıxara bildi. Daha sonra nazir qeyd etdi ki, XX əsrin sonunda da millətinə, xalqına dayaq olan lider – Heydər Əliyev Azərbaycanı ağır vəziyyətdən çıxardı, vətənimizin müstəqilliyini möhkəmləndirdi. Dövlətçilik ənənələrimizin yaşadıcısı olaraq ümummilli lider Heydər Əliyev beynəlxalq miqyasda Azərbaycanın mövqelərini möhkəmləndirdi. Bu gün Azərbaycan uğurla inkişaf edir. Azərbaycan Prezidenti İlham Əliyevin son illərdəki fəaliyyətinə əsaslanaraq əminliklə demək olar ki, ulu öndərimiz Heydər Əliyevin siyasi kursunun davam etdirilməsində yeni bir mərhələnin başlanğıcı qoyulmuşdur. Bu gün YUNESKO və İSESKO-nun xoşməramlı səfiri, Azərbaycanın birinci xanımı Mehriban Əliyevanın səyi nəticəsində Azərbaycan mədəniyyəti gənc istedadlarımız tərəfindən Parisdə, Strasburqda və Brüsseldə Cümhuriyyətin 90 illiyinə həsr olunmuş tədbirlərdə iştirak edirlər.
Elmi konfransda AMEA-nın müxbir üzvi Yaqub Mahmudov, iqtisad elmləri namizədi Xosrov Kərimov, sənətşünaslıq doktoru, professor İsrafil İsrafilov, filologiya elmləri doktoru, professor Alxan Məmmədli, filologiya elmləri doktoru Sayalı Sadıqova, tarix elmləri namizədi, dosent Lətifə Məmmədova mövzu ətrafında məruzə etdilər.

Xalq qəzeti.- 2008.- 28 may.- S. 10.