Mədəniyyət və Turizm Nazirliyində görüş

Noyabrın 25-də Mədəniyyət və Turizm naziri Əbülfəs Qarayev ölkəmizdə səfərdə olan Kitabxana Assosiasiyaları və İnstitutları Beynəlxalq Federasiyasının (İFLA) prezidenti Ellen Tisenlə görüşmüşdür.

Xanım Elleni Bakıda salamlamaqdan məmnunluq duyduğunu bildirən nazir ölkəmizin kitabxana şəbəkəsi barədə qonağa ətraflı məlumat vermişdir. Diqqətə çatdırmışdır ki, Azərbaycan hazırda əksər beynəlxalq təşkilatlarla sıx əlaqələr qurmuşdur. Ölkəmizdə kitabxanaların beynəlxalq əlaqələrindən danışarkən bildirilmişdir ki, Milli Kitabxana və Prezident Kitabxanası digər xarici qurumlarla yanaşı, sizin prezidenti olduğunuz Kitabxana Assosiasiyaları və İnstitutları Beynəlxalq Federasiyasının da üzvüdür.

Azərbaycan xalqının tarixində əlifbanın 4 dəfə dəyişdirilməsinin, son dəfə kirilin latınla əvəzlənməsinin onun maariflənməsində, elminin inkişafında müəyyən çətinliklər törətdiyini deyən nazir vurğulamışdır ki, həyata keçirilən tədbirlər nəticəsində problem aradan qaldırılır, bu sahədə uğurlu addımlar atılır. Dövlətimizin başçısı İlham Əliyevin müvafiq sərəncamı ilə Azərbaycan və dünya ədəbiyyatı klassiklərinin əsərləri latın qrafikası ilə nəşr edilərək kitabxanalara hədiyyə olunur. Beləliklə, kitabxana fondlarındakı əvvəlki nəşrlər tədricən latın qrafikalı ədəbiyyatla əvəz olunur.

Azərbaycanda mehribanlıqla qarşılandığı üçün minnətdarlığını bildirən xanım E.Tisen səfərindən məmnun qaldığını vurğulamışdır. Səfərinə Milli Kitabxana ilə tanışlıqdan başladığını deyən qonaq Azərbaycanda öyrənməli təcrübənin olduğunu dilə gətirmişdir.

Xanım Ellen qeyd etmişdir ki, onun hazırkı səfəri İFLA ilə Azərbaycan kitabxanaları arasında əlaqələri daha da artıracaqdır.

Respublika.- 2008.- 26 noyabr.- S. 6.