“Teatr bu gün və sabah” mövzusunda dəyirmi masa keçirildi

Dünən Axundov adına Azərbaycan Milli Kitabxanasında Azərbaycan Respublikası Mədəniyyət və Turizm Nazirliyinin mədəniyyət münasibətləri üzrə elmi metodiki mərkəzin təşkil etdiyi "Teatr bu gün və sabah" mövzusunda dəyirmi masa keçirildi.

Tədbiri giriş sözü ilə fəlsəfə elmləri doktoru, mədəniyyətşünaslıq üzrə elmi-metodiki mərkəzin direktoru Vilayət İsmayılov açaraq, Azərbaycan milli teatrının inkişaf prespektivlərindən, teatra göstərilən böyük dövlət qayğısından danışdı. Sonra AMEA-nın müxbir üzvü, sənətşünaslıq direktoru, professor İnqilab Kərimov "Azərbaycanda peşəkar teatr sənətinin inkişaf inkişaf istiqamətləri" mövzusunda məruzə ilə çıxış etdi.

"Yeni teatr epoxası astanasında" adlı məruzə ilə çıxış edən sənətşünaslıq namizədi Zəminə Axundova teatr haqqında qanunun qəbul olunmasından sonra milli teatrımızda olan köklü dəyişiklərin inkişafına nəzər saldı. O bildirdi ki, teatr haqqında qanun ölkəmizdə XXI əsrin mədəni həyatında böyük yüksəliş dövrünü yaratdı. Ölkə prezidenti İlham Əliyev cənablarının teatrların bərpası ilə bağlı imzaladığı 2007-ci il 9 fevral tarixli sərəncamı Kukla Teatrının, Rus Dram Teatrının, Azərbaycan Milli Dram Teatrının, Opera və Balet Teatrının, Şuşa teatrının və digər teatrın əsaslı təmir olunmasına gətirib çıxardı.

Milli teatrımızın inkişafında və təşəkkül tapmasında Azərbaycanın görkəmli aktyorlarının böyük əməyi və rolu olmuşdur. Teatr sənətinin inkişafında böyük rolu olan aktyorlarımızın hər birinin qarşısında baş əyirik - deyən Zəminə Axundova bu simaların yaradıcılığının dövlət tərəfindən layiqli şəkildə qiymətləndirildiyini də nəzərə çatdırdı. Bu gün teatr haqqında qanun müasir qloballaşma dövründə teatrın texniki və bədii cəhətdən inkişafında təşəkkül tapdı. Teatr insanların dünyagörüşünə böyük təsir göstərir. Teatrda, eyni zamanda, islahatların aparılmasının zəruriliyini vurğulayan Zəminə Axundova, bu baxımdan teatrşünasların üzərinə böyük məsuliyyət düşdüyünü qeyd etdi.

Tədbirdə çıxış edən yazıçı-dramaturq Əli Əmirli qeyd etdi ki, teatrlarda pyeslərin uğur qazanması, onun uğurlu repertuarından asılıdır. Yəni, klassik, eyni zamanda, müsir dramaturqların yeni əsərlərinə səhnə həyatını professional rejissorlar verməlidir. Zamanın sınağından çıxmış böyük dramaturqlar C. Məmmədquzadənin, V.Şekspirin əsərləri yeni quruluşda səhnələşdirilməlidir. Bəzən belə bir fikir səsləndirilir ki, tetrlarımızda inkişaf yoxdur. Bu yanlış fikirdir. Teatrın inkişafı üçün teatr mühiti yaradılmalıdır. Tamaşaçılarda böyük maraq yaradaraq, böyük tamaşaçı auditoriyasının yaradılması mütləqdir. Bu mənada, əksərən gənclərin teatra cəlb olunması zəruridir.

Böyük diskussiya şəraitində keçən tədbirdə teatrşünaslar, rejissor və aktyorlar tərəfindən müxtəlif fikirlər səsləndirildi.

Qeyd edim ki, tədbirdə Şuşa Dövlət Dram Teatrının direktoru, əməkdar artist Yadigar Muradov, yazıçı-dramaturq,prezident təqaüdçüsü, "Humay" və Y.Səmədoğlu adına mükafatlarla təltif edilmiş Elçin Hüseynbəyli, Opera və Balet Teatrının baş rejissoru, əməkdar incəsənət xadimi Hafiz Quliyev və başqa aktyor, rejissorlar iştirak edirdilər.

Səs.- 2008.- 7 noyabr.- S. 12.