Əbülfəs Qarayev: "Azərbaycan Avropa Şurası mədəniyyət nazirlərinin konfransına tam hazırdır

Azərbaycan Bakıda keçiriləcək Avropa Şurasının "Mədəniyyətlərarası dialoq - Avropa və onun qonşu regionlarında sülhün və davamlı inkişafın əsasıdır" mövzusunda keçiriləcək konfransa hazırdır. Bu barədə jurnalistlərlə keçirdiyi görüşdə Azərbaycanın Mədəniyyət və Turizm naziri Əbülfəs Qarayev məlumat verib.

Ə.Qarayev bildirib ki, konfransa hazırlıqla bağlı Baş nazir Artur Rəsizadənin iştirakı ilə goruş keçırılıb. Görüşdə tədbirin təşkilində Mədəniyyət və Turizm Nazirliyinə Azərbaycan dövlətinin lazımi dəstək göstərəcəyi vurğulanıb. "Azərbaycanın beynəlxalq aləmdə nüfuzu Bakını beynəlxalq tədbirlərin məkanına çevirib. Konfrans 8 illik fasilədən sonra ilk dəfə Bakıda keçiriləcək və Avropanın mədəniyyət nazirlərinin toplantısı kimi yadda qalacaq. Ümumilikdə 250-dək iştirakçının qatılacağı toplantıya ilk dəfə olaraq Avropa ölkələrindən başqa, İslam ölkələrinin nazirləri də dəvət olunub" - deyə Ə.Qarayev vurğulayıb.

Ə.Qarayevin sözlərinə görə, konfransın yekununda qəbul olunacaq Bakı bəyannaməsi nəticəsində Bakı şəhərinin adı Avropa Şurasının sənədlərində "Bakı prosesi" kimi qeyd olunacaq. Ə.Qarayev Ermənistanın konfransda iştirakı məsələsinə də münasibət bildirib. "Artıq rəsmi qeydiyyat prosesi başa çatıb və Ermənistan iştirakını təsdiqləməyib. Lakin bu ölkədən də nümayəndənin qatılacağını gözləyirik və həmin nümayəndəyə də digər qonaqlar kimi eyni şərait yaradılacaq" - deyə Ə.Qarayev əlavə edib.

Mövqe.- 2008.- 29 noyabr-1 dekabr.- S. 7.