Nəzərli T.

Qax həm turizm məkanıdır

 

Buranın payızı da gözəldir. Magistral yoldan rayon mərkəzinə tərəf dönəndə füsunkar payız mənzərələri adamın ruhunu oxşayır. Yolun kənarları boyu sıralanmış ağaclardan qopub düşən, uçuşan qızılı yarpaqlar abadlığın, səliqə-sahmanın fonunda daha sehrli görünür. Rayon mərkəzinə yaxınlaşdıqca hiss edirsən ki, abad müasir bir şəhərə daxil olursan. Adama elə gəlir ki, tikinti-quruculuq istiqamətində rayonda görüləsi bir qalmayıb. Rayon icra hakimiyyətinin başçısı Mübariz Əhmədzadə ilə Qax-Muğal kanalı tərəfdə görüşürük. Təəssüratımızdan razılığını bildirir. Ancaq qeyd edir ki, hələ görülməli işləri çoxdur.

Suvarma üçün böyük əhəmiyyət kəsb edən Qax-Muğal kanalının uzunluğu 4 kilometrdir. Kanalın içi lildən təmizlənmiş, mövsümi işlər başa çatdırılmışdır. Kanalın kənarına dəmir məhəccər vuran, piyadalar üçün səki düzəldən fəhlələrə avandlığı arzuladığımız vaxtda Suvarma Sistemləri İdarəsinin rəisi Soltan Camalov gəlib çıxır. Söhbət əsnasında idarənin istismar tədbirləri əsaslı təmir işləri ilə maraqlanırıq. S. Camalov bildirir ki, ilin əvvəlindən bəri 2017 kubmetr beton bənd, 819 kubmetr qabion bənd tikilmiş, 167,5 min kvadratmetr həcmində suvarma kanalları lildən təmizlənmişdir. Bu işlər əsasən Kürmükçay məcrasında ayrı-ayrı suvarma şəbəkələrində yerinə yetirilmişdir. Yeri gəlmişkən bildirək ki, Kürmükçay məcrasında 462 kubmetr təmizləmə işləri aparılmış, Əlibəyli İbaxlı kəndlərini qoruyan beton bəndlərin aralarındakı ayrı-ayrı hissələrdə qabion bəndləri tikilmişdir. Tikilmiş bəndlərin üzərinə çay məcrasından torpaqqoruyucu bəndlər vurulmuşdur. Hazırda Əlibəyli kəndi ərazisindəki çay məcrasında təmizləmə işləri, Kürmükçay məcrasında Qax şəhəri ərazisini qoruyan daş-beton bənddə təmir, Zəyəm kəndi ərazisindən keçən Lələli, Dəymədağlı Qıpçaq suvarma kanallarında lildən təmizləmə işləri aparılır.

S.Camalov həmçinin bildirir ki, ilin əvvəlindən bəri 15 hidrotexniki qurğu, 6 hidrotexniki post, 3 mülki və istehsalat binası cari təmir edilmiş, əsaslı təmir planı üzrə Qax-İngiloy kanalında 4020, Qax-Muğal kanalında 3200 metr torpaq kanal beton üzlüyə alınmış, İlisu selötürücü qurğuda təmizləmə, Cəlayer su götürən qurğuda və Qaşqaçay su kəmərində əsaslı təmir işləri görülmüşdür.

Onu da qeyd edək ki, Prezident İlham Əliyev bu ilin sentyabr ayında Şəki-Zaqatala bölgəsinə səfəri çərçivəsində Qax rayonunda da olmuş, şəhər parkı ilə tanışlıqdan sonra ümummilli lider Heydər Əliyevin abidəsinin açılışı mərasimində, həmçinin Qax şəhərində tikilicək idman kompleksinin təməlqoyma mərasimində iştirak etmiş, ictimaiyyətin nümayəndələri ilə görüşmüşdür. Bu gün hər bir qaxlı həmin görüşü böyük məhəbbətlə xatırlayır. Qaxın köhnə Şəki yoluna çıxışını birləşdirən körpünün əsaslı təmir işlərini aparan Qax 16 saylı Yol İstismar İdarəsinin rəisi Əhməd Mirzəbəyov deyir ki, Prezidentin bölgəyə səfəri bizi yeni qələbələrə ruhlandırdı, rayonda tikinti-quruculuq işləri daha da sürətləndi.

Rayon icra hakimiyyəti başçısının birinci müavini Tahir İsmayılovla inşası başa çatmış tikiş fabrikinə baş çəkirik. Öyrənirik ki, bu yeni müəssisədə 45 nəfər işlə təmin olunacaq.

Prezident İlham Əliyev demişdir: "Azərbaycanda bütün bölgələrdə sürətli inkişaf gedir. Bizim maddi imkanlarımız artır istəyirik ki, bu imkanlardan səmərəli istifadə edək. Azərbaycan üçün vacib olan məsələlər öz həllini tapsın, bütün bölgələrdə inkişaf daha da sürətlə getsin". Qax rayonu da bu inkişafdan bəhrələnir. Rayonun bugünkü sosial-iqtisadi imkanları, həyata keçirilən layihələr təkcə qaxlılar üçün nəzərdə tutulmur. Gözəl təbiəti olan Qax həm turizm məkanıdır. Bu baxımdan daha geniş turizm imkanlarının gerçəkləşdirilməsi diqqətdən kənarda qalmamalıdır.

Azərbaycan.- 2008.- 23 noyabr.- S. 5.