Əliyev Ə.

 

Strasburqdakı УAzərbaycan eviФ xüsusi fəaliyyət proqramı hazırlamışdır

 

Strasburqda fəaliyyət göstərən "Azərbaycan evi" ölkəmizlə bağlı həqiqətləri müntəzəm olaraq fransız xalqına çatdırmaq məqsədi ilə 2009-cu il üçün "Azərbaycanı tanıyaq" adı altında xüsusi fəaliyyət proqramı hazırlamışdır.

Proqramda hər ayın son həftəsində iki saat efirə çıxacaq radio verilişlərində ölkəmizdə baş verən mühüm hadisələr barədə dolğun və operativ məlumatın verilməsinin təkmilləşdirilməsi, "Azərbaycan evi"nin nəzdində kinoklub yaradılması və orada Azərbaycan filmlərinin nümayiş etdirilməsi, azərbaycanlı gənclər və tələbələr arasında şahmat yarışlarının, Azərbaycan dili, rəqsləri və mətbəxi kurslarının təşkil olunması öz əksini tapmışdır.

Qurum fransız gəncləri ilə azərbaycanlı tələbələrin yaxın ünsiyyətdə olması üçün Azərbaycan mahnı və rəqslərinə həsr olunmuş gecələr, müxtəlif mövzularda sərgilər təşkil etməyi də qarşısına məqsəd qoymuşdur. Fransa televiziyasının "Odissey" verilişində Azərbaycan filmləri nümayiş ediriləcəkdir.

Proqramda yerli təşkilat və qurumlarla sıx əlaqə yaratmaq məqsədi ilə Mark Blok Universitetinin türkologiya departamenti ilə birlikdə Azərbaycan ədəbiyyatına dair gecələrin təşkilinə xüsusi yer ayrılmışdır. "Azərbaycanla mədəniyyət və təhsil sahəsində əlaqələr", Bakı-Tbilisi-Ceyhan neft kəməri və Avropanın enerji strategiyası, "Avropanın enerji daşıyıcıları ilə təmin edilməsində Azərbaycanın rolu" və digər mövzularda konfranslar təşkil ediləcəkdir.

Ölkəmizin tarixi, əlamətdar hadisələr, Dünya Azərbaycanlılarının Həmrəyliyi Günü, digər bayramlar, 20 Yanvar və Xocalı faciələri ilə bağlı tədbirlərin keçirilməsi də qərara alınmışdır.

Azərbaycan.- 2008.- 18 noyabr- S. 6.