Haaqada Azərbaycanın Holland Dostları cəmiyyəti təsis edilmişdir

Azərbaycanın Niderland Krallığındakı səfirliyindən AzərTAc-a bildirmişlər ki, noyabrın 17-də Haaqada "Azərbaycanın Holland Dostları" (AHD) cəmiyyətinin təsis iclası keçirilmişdir.

Haaqanın "Carlton Ambassador" otelinin konfrans zalında toplaşan mərasim iştirakçılarını salamlayan AHD cəmiyyətinin icraçı direktoru Marion van der Veqt qurumun yaradılması, əsas məqsədləri, gələcək fəaliyyəti barədə məlumat vermişdir. Qeyd olunmuşdur ki, cari ilin may və iyun aylarında Azərbaycanın birinci xanımı, YUNESKO və İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban Əliyevanın dəstəyi ilə Bakıda keçirilmiş beynəlxalq konfransların iştirakçısı olan bir qrup holland ziyalısı vətənə qayıdandan sonra Azərbaycanla bağlı təəssüratlarını Niderland ictimaiyyətinin geniş dairələrinə çatdıraraq "Azərbaycanın Holland Dostları" cəmiyyətinin yaradılması təşəbbüsünü irəli sürmüş və bu təşəbbüsün reallaşmasına nail olmuşlar.

Marion van der Veqt vurğulamışdır ki, Niderlandın Avropa ölkələri ailəsinin digər üzvü olan, dünyada ən sürətli iqtisadi inkişafa malik, regionun siyasi liderinə çevrilmiş, öz nadir tarixi, mədəniyyəti, tolerantlığı ilə seçilən, sivilizasiyalararası dialoqu təmin etmək iqtidarında olan Azərbaycan ilə əməkdaşlığının genişləndirilməsi holland xalqının maraqlarına cavab verir. Bildirilmişdir ki, tərkibində Azərbaycana rəğbət bəsləyən Niderlandın tanınmış elm və mədəniyyət xadimlərini, ziyalıları, parlament üzvlərini, ictimai birliklərin nümayəndələrini, jurnalistləri və iş adamlarını birləşdirən cəmiyyətin əsas məqsədi bu ölkənin Azərbaycan ilə əlaqələrinin inkişafına təkan verməklə ölkələrimiz arasında mövcud olan ikitərəfli əməkdaşlığı tərəfdaşlıq səviyyəsinə yüksəltməkdən ibarətdir.

Azərbaycan haqqında sənədli film nümayiş etdirildikdən sonra çıxış üçün söz Azərbaycan Respublikasının Niderland Krallığındakı səfiri Fuad İsgəndərova verilmişdir. Mərasim iştirakçılarını salamlayan səfir Azərbaycan-Niderland münasibətlərinin inkişafı haqqında ətraflı məlumat vermiş, ölkələrarası əməkdaşlığın genişlənməsində vətəndaş cəmiyyətinin, ictimai təşkilatların xüsusi rol oynadığını vurğulamış, AHD-nin yaradıcılarına və üzvlərinə təqdirəlayiq təşəbbüsə görə təşəkkürünü bildirmiş, təşkilata gələcək fəaliyyətində uğurlar arzulamışdır.

Mərasimdə AHD-nin idarə heyəti seçilmişdir. Cəmiyyətin sədri vəzifəsinə Azərbaycana böyük rəğbət bəsləyən, ölkəmizlə uzun müddət səmərəli əməkdaşlıq təcrübəsinə malik, dünya miqyaslı siyasətçi, Avropa Şurası Parlament Assambleyasının sabiq baş katibi, Niderland parlamentinin Yuxarı Palatasının nüfuzlu senatorlarından biri olan Rene van der Linden seçilmişdir.

İdarə heyətinə Niderlandın keçmiş xarici işlər naziri, ölkənin siyasi elitasında böyük nüfuza malik, bir sıra tanınmış beynəlxalq təsisatların rəhbəri və fəxri üzvü, doktor Bernard Bot, Niderlandın Sərhəd Qoşunlarının sabiq komandanı, holland hərbçiləri sıralarında xüsusi hörmət sahibi olan, hazırda ədliyyə nazirinin müşaviri vəzifəsində çalışan general-leytenant Diderik Fabius, Leyden Universitetinin Azərbaycan üzrə tarixi araşdırmalar, təlim proqramları və elmi tədqiqatların təşkili sahəsində ixtisaslaşmış professor Turac Atabaki, uzun müddət Beynəlxalq Miqrasiya Təşkilatının Azərbaycandakı nümayəndəsi vəzifəsində çalışmış və bu dövr ərzində ölkəmizdə bir sıra layihələrin həyata keçirilməsinə nail olmuş, hazırda Beynəlxalq Miqrasiya Təşkilatının Niderland üzrə təmsilçisi Yost van der Aalst, Azərbaycanın bir sıra rayonlarında kənd təsərrüfatı sahəsində yeni texnologiyaların tətbiqi sahəsində ölkə fermerləri ilə əməkdaşlıq edən "Avalon Fondunun" icraçı direktoru Martin Lankaster seçilmişlər.

Cəmiyyətin sədri Rene van der Linden tədbir iştirakçılarına ona etimad göstərdiklərinə görə təşəkkür edərək, Azərbaycana olan xüsusi münasibətini vurğulamış, ölkəmizə səfərlərini və qazandığı azərbaycanlı dostlarını xatırlayaraq, qurumun üzvlərini ölkəmizi Niderlandda daha yaxından tanıtmağa, onun nailiyyətlərini daha geniş təbliğ etməyə çağırmış, təşkilatın iki dövlət arasında münasibətlərin möhkəmləndirilməsi istiqamətində daim dəstək göstərəcəyinə ümidvar olduğunu söyləmişdir.

Doktor Bernard Bot ölkəmizin tolerantlıq və sivilizasiyalararası dialoqun həyata keçirilməsi sahəsindəki nailiyyətlərindən, Azərbaycanın sürətli inkişafından danışmış, dövlətlərarası münasibətlərin daha yüksək səviyyəyə gətirilməsi arzusunu bildirmişdir.

Mərasimin rəsmi və ziyafət hissələrində təşkil olunmuş müzakirələr zamanı AHD tərəfindən siyasi, iqtisadi və humanitar sahələr üzrə 2009-cu il üçün nəzərdə tutulmuş tədbirlərin keçirilməsinə dair konkret təkliflər irəli sürülmüşdür.

Azərbaycan.- 2008.- 20 noyabr.- S. 2.