Yusifova S.

Xalq tətbiqi sənəti ustaları mükafatlandırılıb

Mədəniyyət və Turizm Nazirliyində həvəskar rəssamlar və xalq tətbiqi sənəti ustalarının əl işlərindən ibarət respublika baxış-müsabiqəsi qaliblərinə mükafatların təqdimatı ilə bağlı mərasim keçirilib. Tədbirdə çıxış edən Mədəniyyət və turizm nazirinin müavini Sevda Məmmədəliyeva baxış-müsabiqənin Azərbaycan xalqının ümummilli lideri Heydər Əliyevin 85 illik yubileyinə həsr olunduğunu bildirib. Nazir müavini ölkə rəhbərliyinin ümumilikdə bu sahəyə xüsusi qayğı ilə yanaşdığını tədbir iştirakçılarının diqqətinə çatdırıb. Qeyd edək ki, baxış-müsabiqənin ilkin mərhələsində 4000 sənət nümunəsi, yekun mərhələdə isə 160 nəfərin 600-nə yaxın ən dəyərli əl işləri nümayiş etdirilib. Baxış-müsabiqədə heykəltəraşlıq, xalçaçılıq, zərgərlik, musiqi alətləri və rəngkarlıq sənəti üzrə fərqlənmiş 15 nəfər rəssam və xalq tətbiqi sənəti ustasına nazirliyin diplomları və pul mükafatları təqdim olunub.

525-ci qəzet.- 2008.- 11 noyabr.- S. 7.