Sevda

Esmira Novruzova və Rahib İsrafilov birinci oldular

Onlara “Best Model of World-2008” uğurunda yarışmaq şansı verildi

Noyabrın 11-də Heydər Əliyev Sarayında "Best model of Azerbaijan" model yarışmasının qaliblər müəyyən olundu. Qeyd edək ki, müğənni Ruhinin prezidentliyi ilə keçirilən "Best model of Azerbaijan" yarışmasında 15 qız və 15 oğlan model yarışdı. Müsabiqənin yaradıcısı və prezidenti Erkan Özərman, fransız modelyeri Stefano Roland, Azərbaycanın xalq artisti İlhamə Quliyeva, iş adamı Nahid Kabakçı, "Best model of Azerbaijan" yarışmasının prezidenti Ruhi, Azərbaycan Dövlət Musiqili Komediya Teatrının direktoru Əliqismət Lalayev, Türkiyənin tanınmış modelyeri Şeney Akay, "Fashion model school"un rəhbəri Lyubov Kutorova, stilist Anar Ağakişiyev münsiflər heyətində təmsil olunurdular.

Kamilə Babayeva və Emin Musəvinin aparıcılığı ilə keçirilən yarışmada 30 iştirakçı ilk olaraq çimərlik paltarında, sonra isə modelyer Zemfira Qurbanova tərəfindən hazırlanmış avanqard, milli və gecə geyimlərində səhnəyə çıxdılar.

Sonra öz ifaları ilə tədbirə rəng qatan "Aşk bitdi" mahnısının ifaçısı, türkiyəli müğənni Kərəm Cem çıxdı. O, ifaları ilə modelyerlərə dəstək oldu. Mahnıların əksəriyyətini gitarada oxuyan müğənni Azərbaycan mahnılarına da yer ayırdı. Azərbaycanda ilk dəfə olduğunu deyən sənətçi müsabiqənin prezidenti Ruhi tərəfindən dəvət olunduğunu bildirdi. Öz təəssüratlarını səhnədə tamaşaçılarla bölüşən türkiyəli müğənni qeyd etdi ki, çox təəssüf edirəm ki, bu, mənim Azərbaycana ilk səfərimdir. Həqiqətən də Azərbaycan çox gözəl ölkədir və mən bunun şahidi oldum. Bundan sonra Azərbaycana daha tez-tez gələcəyəm". Azərbaycana dörd il bundan əvvəl dəvət olunduğunu bildirən müğənni, bu dəvətlərin həyata keçirilməməsinə məyus olduğunu dilə gətirdi. "Mən Azərbaycandakı pərəstişkarlarımla şəxsi saytım vasitəsi ilə əlaqə saxlayıram və onlar tərəfindən dəfələrlə Azərbaycana dəvət olunmuşam. Yaxın vaxtlarda Azərbaycanda solo konsert vermək istəyirəm. Düşünürəm ki, növbəti səfərim daha uzunmüddətli olacaq".

Tədbirin sonunda iştirakçılar müəyyən olundu. Münsiflər Heyətinin qərarı ilə "Ən yaxşı yeriş" nominasiyasına Əli Abbasov və Yuliya Klimova, "Fashion model school" nominasiyasına Rahib İsrafilov və Esmira Novruzova, "Best Fucier model" nominasiyasına Tural Zeynalov və Yekaterina Seldikova, "Best Grace" nominasiyasına Nigar Əliyeva, "Best centlmen" nominasiyasına Qabil Həmzəyev layiq görüldülər. Yarışmada 3-cü yeri Fərid Əsgərov və Çinarə Abdullayeva, 2-ci yeri Şövkət Qasımova və Azər Atakişiyev tutdular. Nəhayət, "Best model of Azerbaijan" yarışmasında 1-ci yerin qalibi Esmira Novruzova və Rahib İsrafilov oldu. Qaliblər dekabrın 6-da İstanbulda keçiriləcək "Best model of the world" yarışmasında Azərbaycanı təmsil edəcəklər. Yarışmanın ikincisi Şövkət Qasımova isə gələn il Çində keçiriləcək "Miss turizm -2009" yarışmasında ölkəmizi təmsil edəcək. Gənc modelə bu təklif "Best model of the world" müsabiqəsinin prezidenti Erkan Özərman tərəfindən gəlib. Fransalı modelyer Stefano Roland da iştirakçıların birini özü ilə Parisə aparacaq və onu dünyanın ən tanınmış səhnələrinə çıxaracaq. Lakin həmin modelin adı bir neçə gündən sonra açıqlanacaq. Builki "Best model of Azerbaijan-2008"in yüksək səviyyədə təşkil olunmasına görə, Ruhi də Erkan Özərman tərəfindən "Ən yaxşı təşkilatçı" mükafatı ilə təltif edildi. Xatırladaq ki, "Best model of Azerbaijan-2008" müsabiqəsinin rejissoru və xoreoqrafı Türkiyədən dəvət olunmuş Tamer Kurter idi.

Kaspi.- 2008.- 13 noyabr.- S. 15