Ağaoğlu T.

 

Unudulmaz aktyor, rejissor

 

110 ildir ki, milli kino sənətimiz yol gəlir. Həmkarları, dostları, ədəbi ictimaiyyət tərəfindən anım günü qeyd edilən əməkdar incəsənət xadimi Ağarza Səməd oğlu Quliyev elə bu tarixlə həmyaşıddır. O, Lənkəran bölgəsində dünyaya göz açmışdı.

Sənətin keçdiyi yol enişli-yoxuşlu olub. Bəzi qüvvələr yaradıcı insanlara təsir göstəriblər, onları amal-məqsədlərindən uzaqlaşdırmağa çalışıblar. Çəkilişlərin aparılmasına, aktyorların rollar oynamasına qadağalar da qoyulub. Lakin qədirbilənlər onu yaşadıblar, müasir vaxtımıza çatdırıblar.

Aktyor-rejissor Ağarzanın da uşaqlıq, yeniyetmə çağları məşəqqətli, ağır keçib. Amma əqidəsindən dönməyib, arzularının ardınca inamla gedib. Onun 110 illiyinə həsr olunmuş tədbirdə Azərbaycan Dövlət Film Fondunun direktoru, əməkdar incəsənət xadimi Cəmil Quliyev dedi:

- Mərhum Ağarza Quliyev çörək pulu qazanmaq üçün Bakıya gəlmişdi. Taleyi onu kino sənətinə qovuşdurur. O, teatr məktəbini bitirmişdi. Aktyorluğa meylini, marağını duyanlar onu kino studiyaya dəvət edirlər. İlk dəfə rejissor Georgi Kravçenkonun "Bayquş" bədii filmində baş rola - nökər Əli roluna çəkilmişdi. Unudulmaz aktyor-rejissor xatirələrində yazıb: "Zəmanə məni məcbur etdi ki, aktyor olum. Sənətin sehrin-sirrin biləndən sonra rejissorluğa da meylim artdı".

Ağarza Quliyevin milli kino sənətimizin inkişafında xidmətləri çox olub. "Gilan qızı"nda Əli, "İlk komsomol buruğu"nda Məmməd, "Əziz adamlar"da Şərif, "Qızıl göl" filmlərində əsas rollara çəkilmişdi. O, yazıçı-dramaturq Cəfər Cabbarlı, görkəmli səhnə xadimləri Abbas Mirzə Şərifzadə, Mikayıl Mikayılov başqaları ilə birgə işləmiş, onların ənənələrini yaşatmaq üçün var gücü ilə çalışmışdı. Ekranlardan tanınan, şöhrət qazanan aktyor qonşu Gürcüstan Respublikasında istehsal olunan "Görüş" bədii filmində Əhməd roluna çəkilmişdi. Sonrakı illərdə Ağarza Quliyev "Mən ki, gözəl deyildim" filmində Rəhim baba, "Sevil" film-operasında Babakişi rollarında oynamışdı.

A.Quliyev aktyorluğu ilə yanaşı, rejissorluğa da böyük maraq göstərmişdi. O, "Direktiv bant", "Dostlar", "Almaz", "Vətən oğlu", "Qara daşlar", "Səhər", "Ulduz" başqa bədii, bir neçə sənədli filmlərə quruluş vermişdi. Unudulmaz sənətkarın sovet xarici ölkə filmlərin ana dilimizdə səsləndirilməsində misilsiz xidmətləri olmuşdur.

Sonda film fondun foyesində 78 yaşında dünyasını dəyişmiş, kino yaradıcılığında böyük xidmətləri ilə yadda qalan aktyor-rejissorun həyatını, yaradıcılığını canlandıran foto-sərgi nümayiş olundu.

Azərbaycan
.- 2008.- 4 noyabr.- S. 7.