“Fokus” kinojurnalının daha bir
sayı işıq üzü görüb
Azərbaycan
kino tarixində ilk və hələlik yeganə analitik kino
jurnalı sayılan "Fokus" yenidən oxucularla
görüşə gəlib. Jurnalın
bu sayında Oqtay Mirqasımov və Şamil Nəcəfzadənin müsahibələri,
kinorejissor Şamil Əliyevin "Arxaik motivlər" kinossenarisi
çap olunub. "Azərbaycan - Vətən
yoxsa, ərazi? Xalq, yoxsa kütlə?"
başlığı altında
polemikanın iştirakçıları
Zərdüşt Əlizadə,
Rauf Mirqədirov, Şahbaz Xuduoğlu, Şeyx Əbdül Mahmudbəyov, Seymur Baycan müasir Azərbaycan cəmiyyətinin
aktual problemlərini müzakirə ediblər. Azərbaycan dilində kino dərsliklərinin praktiki olaraq yoxluğunu nəzərə
alsaq, jurnalın kino fakültəsinin tələbələri üçün
əhəmiyyəti bir
daha aydınlaşar.
Jurnalın
təsisçisi Gənc Film İstehsalçıları
Assosiasiyasının sədri Əli İsa Cabbarovun
söylədiyinə görə, Azərbaycan kinosunda
"informasiya məkanının" yaranması çox
vacib amillərdəndir. Odur ki, jurnal həm
də bu funksiyanı yerinə yetirməyə çalışır".
Qeyd edək ki, "Fokus"un ilk nömrəsi
kino peşəkarları
tərəfindən maraqla
qarşılanıb. Kinorejissor
Ayaz Salayev jurnalın MDB məkanında
yayılması üçün
onun həm də rusca nəşrini
vacib sayıb.
Jurnalda
Sevda Sultanova, Aygün Aslanlı, Vəfa Cəfərova,
Vüsal Məmmədov, Günel Əliyeva və başqa
müəlliflərin də yazıları yer alıb. "Fokus"un təsisçilərindən
olan kinorejissor Asif Rüstəmov jurnalın kinoşünaslığın
və kino nəzəriyyəsinin inkişafı
baxımından da əhəmiyyət daşıdığını
diqqətə çatdırıb.
Bu nəzərdən Teymur Daiminin "Bəs kino olubmu?"
məqaləsi Azərbaycan
kino tarixinə yeni rakursdan baxmağa kömək edə bilər.
Jurnalı
Bakı Metropoliteninin və "Qasid" mətbuat
yayımı şirkətinin köşklərindən
əldə etmək olar.
525-ci qəzet.- 2008.- 1 noyabr.- S. 23.