Ağaoğlu T

Ağaoğlu T.

Milli kino sənətimizin cəfakeşlərindən biri də xalq artisti Rasim Ocaqov ömrünün 50 ildən çoxunu kinokamera arxasında, bədii filmlərin çəkildiyi meydançalarda keçirmişdi. Unudulmaz kino xadiminin anım günü keçirilən tədbirdə Azərbaycan Dövlət Film Fondunun direktoru, əməkdar incəsənət xadimi Cəmil Quliyev dedi:

- Rasim Ocaqov Ümumittifaq Dövlət Kinematoqrafiya İnstitutunu bitirmiş, 1955-ci ildən "Azərbaycanfilm" kinostudiyasında işləmişdi. Dövlət mükafatlarına, xalq artisti fəxri adına layiq görülmüşdü. "Bir məhəlləli iki oğlan", "Uzaq sahillərdə", "Onun böyük ürəyi", "Mən rəqs edəcəyəm" və başqa bədii, tammetrajlı ftlmlərin quruluşçu operatoru olmuşdu. 1974-cü ildən isə quruluşçu rejissor kimi fəaliyyət göstərmişdi. Lentə aldığı "Qatır Məmməd", "Tütək səsi", "Ad günü", "Təhminə", "İstintaq", "Həm ziyarət, həm ticarət" filmləri dünyanın əksər ölkələrində maraqla qarşılanmışdı. Görkəmli kino operatorun, rejissorun 75 illiyi ölkəmizin hər yerində qeyd edilir.

Tədbir iştirakçıları ürək sözlərini belə ifadə etdilər:

Hacı İsmayılov, xalq artisti: - Rasim Ocaqov son dərəcə mülayim təbiətli, zəhmətsevər kino sənətkarı idi. Neyləmək olar, bir gün gəlir ki, həyatdan gedirsən. İnanıram ki, Rasimdən qalan xoş xatirələr onun ikinci ömrünü yaşadacaq.

Şəfiqə Məmmədova, xalq artisti: - Rasim müəllim, milli kinomuzun korifeylərindən biri idi. Onun lentə aldığı, mənim də oynadığım "İstintaq" filmi keçmiş SSRİ məkanında ədəbi hadisə kimi qarşılanmışdı. O, kino yaradıcılığına ürəkdən bağlı idi.

Rasim Balayev, xalq artisti: - "Həm ziyarət, həm ticarət" filminə çəkilməyə dəvət alanda sevindim. Rasim Ocaqovun rejissor olduğunu biləndə fərəhim ikiqat artdı. O, çox sadə, qayğıkeş insan idi.

R.Ocaqov sənədli kino sənəti tarixində də unudulmaz iz qoyub. Vaxtilə lentə aldığı "Bakı bu gün", "Məhəmməd Füzuli", "Abidələr danışır", "Dağıstanın səhnə ustaları", "Çiçək yağışı" qısametrajlı, bədii-publisistik filmləri orijinallığı ilə seçilir, həvəslə baxılır. Onun anım mərasimində çox xatirə söylənildi. Son qənaət isə belə oldu: Rasim Ocaqovun əziz xatirəsi heç vaxt, heç zaman unudulmayacaqdır.

Azərbaycan.- 2008.- 20 noyabr.- S. 8.