Kinooperator Şərif Şərifovun 70 illiyinə həsr olunmuş xatirə gecəsi keçirilmişdir

Noyabrın 7-də Azərbaycan Kinematoqrafçılar İttifaqında əməkdar incəsənət xadimi, kinooperator Şərif Şərifovun anadan olmasının 70, əmək fəaliyyətinin 50 illiyinə həsr edilmiş xatirə gecəsi keçirilmişdir.

Azərbaycan Dövlət Film Fondunun təşkilatçılığı ilə keçirilən tədbirdə, Fondun direktoru, əməkdar incəsənət xadimi Cəmil Quliyev bildirmişdir ki, Azərbaycan kinematoqrafiyasının tarixində özünün peşəkarlığı ilə çalışdığı sahənin inkişafında mühüm rol oynayan şəxsiyyətlər çox olmuşdur. Şərif Şərifov məhz belələrindəndir.

Kinoşünas, əməkdar incəsənət xadimi Aydın Kazımzadə mərhum yubilyarla bağlı uşaqlıq xatirələrindən söz açaraq vurğulamışdır ki, Ş.Şərifov hələ məktəb illərindən bu sənətə maraq göstərirdi. Biz birlikdə Pionerlər evinin fotodərnəyinə gedirdik. Mənim üçün bu adi maraq olsa da, Şərif üçün yaradıcılıq yolunun başlanğıcına çevrilmişdir.

1958-ci ildən həyatını kino ilə bağlayan Ş.Şərifov Cəfər Cabbarlı adına "Azərbaycanfilm" kinostudiyasında fəaliyyətə başlamışdır.

Koroğlu", "Leyli və Məcnun", "Böyük dayaq", "Əhməd haradadır?", "Yenilməz batalyon" filmlərinin quruluşçu operatorları A.Meybom, A.Nərimanbəyov, X.Babayev və Y.Fogelmanın assistenti olmuşdur.

1970-ci ildə Ümumittifaq Dövlət Kinemotoqrafiya İnstitutunun kinooperatorluq fakültəsini bitirdikdən sonra "Qatır Məmməd" (T.Axundovla birgə), "Qərib cinlər diyarında", "Şir evdən getdi" (R.İsmayılovla birgə), "Yol əhvalatı" (Ə.Ələkbərovla birgə) və sair bədii filmlər çəkmişdir.

Gecədə Ş.Şərifovun yaxınları və dostları onunla bağlı xatirələrini danışmışlar.

Azərbaycan.- 2008.- 8 noyabr.- S. 6.