Efir məni peşəkar ifalarla doydura bilmir

Qəndab Quliyeva Qarabağı bayatıları ilə vəsf etmək arzusundadır

"Mən 1982-ci ildə teatrda çalışmışam və bu müddətdə toy bazarı haqqında ümumiyyətlə, düşünməmişəm. O zaman səsimə ziyan olar deyə nə turş, nə də acı təamlar yemirdim. Həmişə özümü soyuqdan qorumuşam. İndiki sənətçilər isə ancaq maşın, ev uğrunda bəhsə giriblər. Peşəkarlıq onların maraq dairəsindən çox-çox uzaqdadır". Bu sözləri Xalq artisti, xanəndə Qəndab Quliyeva deyib. Uzun illərdir səhnədən uzaqlaşan xanəndə xanım şərtlərə boyun əymək istəmədiyini söylədi: "Yeni mahnılar, muğam parçaları yazdırmaq üçün pul lazımdır, mənim isə buna gücüm çatmır. Bir müddət əvvəl mənə zəng edib təzə diskimin çıxdığı xəbərini veriblər. Məlum oldu ki, məni sevənlər köhnə lent yazılarımdakı mahnıları bir yerə toplayıb belə bir təşəbbüslə çıxış ediblər".

Muğamda yeniliklər edən gənclərin ideyasına birmənalı yanaşmayan həmsöhbətim iradlarını bildirdi. Söylədi ki, bu yenilikləri alqışlamır: "Muğamın içində muğam yaradan şəxs acığıma gəlir. Rəhmətlik Hacıbaba Hüseynov deyirdi ki, muğam bir dəryadır, mən bir damla. Ancaq indikilər deyir ki, yox, dərya mənəm. Hələ mən muğamı yaxşı bilmirəm, sən dünən çıxmısan ortalığa, muğamı haradan bilirsən? Muğamın içində elə xırdalıqlar edirlər ki, dəhşətə gəlirəm. Səhvlərinə irad tutanda da acıqlarına gəlir. Amma unutmayaq ki, əvvəlki illərdə muğamı bizlərə sərbəst şəkildə oxumağa imkan vermirdilər. Televiziyaya gəlirdim, deyirdilər ki, dəsgah şəklində muğam oxuma. Amma indi hər birimiz üçün geniş qapılar açılıb. Bundan düzgün şəkildə faydalanmaq lazımdır".

Şou-biznes ifaçılarının muğamdan bəhrələnməsini isə Qəndab xanım ümumiyyətlə, qəbul etmədiyini bildirdi. Onun fikrincə, hər bir fərd bacardığı işin qulpundan yapışmalıdır: "İndiki şou ulduzları özlərini gülünc vəziyyətinə qoyublar. Mən belə çıxışlara yarımçıq ifa kimi baxıram. Konkret hansı yanrda oxuduqlarını müəyyən edə bilmirlər. Son illər ekrana az-az baxıram. Efir məni peşəkar ifalarla doydura bilmir. Yuxarıda sadaladığım problemlərin əksəriyyətini tele-kanallarda görürəm. Vaxtilə Şövkət Ələkbərova, Sara Qədimova əllərini bir-birinin üstünə qoyub, sakitcə oxuyardılar. İndi isə ifaçılar ayaqlarını ayaqlarının üstünə aşırır, bir-birinə efir mədəniyyətindən uzaq hərəkətlər edirlər".

Söhbətinin sonunda Qəndab Quliyeva arzularıdan da söz açdı. Dedi ki, bir çox sənət adamının unutduğu Qarabağ problemi ətrafında çox düşünür və buna yaxın bir layihə ərsəyə gətirmək arzusundadır: "Bu, hələlik arzu olaraq qalır. Çünki qeyd etdiyim kimi, maliyyə imkanlarım qaydasında deyil. Amma qismət olsa, istəyirəm bir klipim olsun, Həcər, Nigar kimi mən də at üstündə çapım, Qarabağın yolunu kəsən sədləri uçurum, dağıdım, erməni işğalında qalan yurdlarımıza baxıb bir bayatı çağırım:

Əslim Qarabağlıdır,

Sinəm çarpaz dağlıdır,

Nə gələn var, nə gedən,

Yollar yaman bağlıdır

Kaspi.- 2008.- 22-24 noyabr.- S. 16.