İbrahimova S.

Azərbaycanda ilk karaoke müsabiqəsi keçirilir

Qalib dünya çempionatına qatılacaq

Azərbaycan yaxın aylarda beynəlxalq "Karaoke World şhips" qurumuna üzv seçiləcək. Hazırda qurum 54 ölkənin yerli təşkilatını özündə birləşdirir. Azərbaycanlı nümayəndələrlə aparılan yazışmalardan sonra ölkəmizə gələn il keçiriləcək beynəlxalq karaoke yarışmasının final gecəsində iştirak etmək şansı veriləcək. Bu barədə məlumat verən müsabiqənin təşkilat komitəsinin nümayəndəsi Zaur Kamal bildirib ki, moskvalı nümayəndələr quruma 2 ildən sonra üzv seçilib. Azərbaycana isə bu şans yanvarın sonunda keçiriləcək assambleyada veriləcək. Həmin ərəfədə Azərbaycanda beynəlxalq qurumun milli təşkilat komitəsinin yaradılması nəzərdə tutulub. Zaur Kamalın əlavəsinə görə, qurumun üzvlüyünə Xalq artisti Yalçın Rzazadə, Əməkdar incəsənət xadimi Baba Vəziroğlu, aranyimançı Yaşar Baxış, Mədəniyyət və Turizm İdarəsinin rəisi Əlikram Əliyev, "ŞFT" MMC-nin rəhbəri Fərhad Şabanov, "Stop klub"un rəhbəri Elçin Səmədov və özünün seçilməsi üçün namizədliyi irəli sürülüb.

Qeyd edək ki, beynəlxalq qurumun şərtlərindən irəli gələn məsələlərdən biri artıq gerçək həllini tapır. Belə ki, "ŞFT" MMC, "Stop Klub" və Zaur Kamalın təşəbbüsü ilə "Karaoke" müsabiqəsinə start verilib. Bakı ərazisini əhatə edən müsabiqədə iştirakçılara bir neçə dildə oxumaq şansı verilir: "Müsabiqədə ciddi məhdudiyyətlər yoxdur. 18 yaşından yuxarı olan istər azərbaycanlı, istərsə də xarici vətəndaşlar müsabiqəyə qatılırlar. Onlar 2 milli, 2 ingilis və digər dillərdə mahnılar oxumalıdırlar. İştirakçılar arasında maraqlı və istedadlı gənclər çoxdur. Müsabiqəyə dekabrın 30-da yekun vurulacaq. İştirakçılar arasında 1 oğlan, 1 qız və 1 qrup qalib seçiləcək. Onlar "Xəzər karaoke" milli mükafatı ilə təltif olunacaqlar və qaliblərə gələn il keçiriləcək beynəlxalq final gecəsində iştirak etmək şansı veriləcək".

Söhbəti zamanı Zaur Kamal müsabiqənin keçirilməsinin vacib tərəflərindən danışdı. Bildirdi ki, Azərbaycanda milli mahnıların minus variantına çox az hallarda rast gəlinir. Karaoke klublarında rus, ingilis və ya başqa ölkələrdən olan musiqilər səsləndirilir. Amma milli mahnılara nadir hallarda rast gəlmək mümkündür. Yerli estrada ulduzlarının minuslarını karaokeyə təqdim etdiyini deyən Zaur Kamal bu vasitə ilə mahnıların təbliğinə geniş yol açmaq niyyətinin genişləndiyini dedi. Söhbətinin sonunda həmsöhbətim növbəti dəfə keçiriləcək müsabiqənin respublika ərazisini əhatə edəcəyini sözünə əlavə etdi. Xatırladaq ki, müsabiqənin münsiflər heyətində yuxarıda adını çəkdiyimiz Yalçın Rzazadə, Baba Vəziroğlu və Yaşar Baxış təmsil olunurlar

Kaspi.- 2008.- 20 noyabr.- S. 16.