Məmmədli E.

Üç oktava açıq səs tale bəxşişidir

Şahin İsmayılov: "İstərdim ki, sənətə yeni gələnlər hər şeydən əvvəl şəxsiyyət olsunlar və sənətdə həmişə təmiz yolu seçsinlər"

Bəzən belə bir ifadə işlədirlər: " Havasızlıqdan darıxıram, havam çatışmır". Bu ifadəni efirdən sənəti ilə yox, bədəni ilə gözümüzə girən müğənniləri görəndə kiçik improvizə edib, belə demək olar:

"Musiqisizlikdən darıxıram, musiqi çatışmır". Təəccüblənməyin, efirdən, radiodan hər gün gözlərimizi və qulaqlarımızı yağır edənlər musiqi deyil. Axı, əsl musiqi və ya səs beyni deşməz, beynə işləyər. Bu gün hay-küylü musiqilər, əgər onlara musiqi demək mümkünsə, fonoqram qəhrəmanları rahatlığımızı əlimizdən alıblar. Onların əlindən nə evdə rahat otura bilirik, nə də getdiyimiz toylarda dincələ bilirik. Hərəsi bir diski vurub qoltuğuna toya gedirlər. Diski əlindən al, elə bil canını alırsan. Ancaq nə yaxşı ki, tək-tük də olsa əsl musiqini yaşadan, ecazkar səs sahibləri var və onlar bizi ruhdan düşməyə qoymurlar. Əksinə, öz sehrli səsləri ilə ruhumuzu oxşayırlar.

Şahin İsmayılov məhz belələrindəndir. Bu ad musiqi ictimaiyyətinə, bir çox dövlət strukturlarına bəlli olsa da, geniş tamaşaçı auditoriyasına bəlkə də bir o qədər tanış deyil. çünki o reklam olunmaqla yox, sənəti ilə məşğuldur. Elə ona görə də mühüm dövlət tədbirlərinə həmişə dəvət alır. Oxuduqları isə bəstəkar mahnıları, klassik əsərlərdən "Sənsiz", "Sevgili canan", "Alagöz", İtalyan əsərləri olan "Karuzo", "O Solo Mio" və s. mahnılardır.Bu qədər musiqi bolluğunda musiqisizlikdən darıxdığımız bir vaxtda Şahin İsmayılovla söhbət edib, ruhumuza rahatlıq vermək istədik.

- Aldığımız məlumatlara görə, qonşu dövlətlərdən də dəvətlər alırsınız. Hansı dövlətlərdir, kimlərdir sizin səsinizin sehrinə düşənlər?

- Türkiyədə, Rusiyada dəfələrlə olmuşam. Sizə bir maraqlı əhvalat danışım. Bakıda mötəbər bir məclisdə çıxış edirdim. Məclis sahibinin Moskvada məşhur iş adamı olan rus qonağı italyan dilində və öz dilimizdə oxuduğum mahnıları dinləyəndən sonra mənə yaxınlaşıb heyrətə gəldiyini bildirdi. Mənim "koordinatlarımı" götürüb soruşdu ki, Moskvada onun ad günündə iştirak edə bilərəmmi? Mən də dedim ki, mən rus mahnılarını çox az oxuyuram. Qayıtdı ki, "istəyirsən Azərbaycan dilində və ya italyan dilində oxu, mənim üçün fərqi yoxdur. Mən yalnız sənin o sehrli səsinə qulaq asmaq istəyirəm".

Bir müddətdən sonra doğrudan da o, məni Moskvaya dəvət etdi və çox yüksək səviyyədə qarşılandımEMəclisdə Azərbaycan romansları ilə yanaşı, rus və italyan dillərində də əsərlər oxudum. Məclisə yığışmış Rusiyanın tanınmış siyasətçiləri və digər məşhur iş adamları tərəfindən çox hərarətlə qarşılandım.

Burada mənim adıma səslənən alqışlar Azərbaycanı təmsil etdiyimə görə qürurverici idi.

- Özünüz öz səsinizi qoruyursunuzmu və ifa zamanı özünüz-özünüzə kənardan baxa bilirsinizmi?

- Səsimi qorumasam, qədrini bilməsəm Allahın mənə bəxş etdiyi bu nemətə nankorluq etmiş olaram. Bu səsi mənə verdiyi üçün elə gün yoxdur ki, mən Allaha şükr etməyim. Mən özümə kənardan baxanda isə həmişə tənqidi yanaşıram. Hər ifadan sonra, baxmayaraq ki, hamı tərəfindən bəyənilir, fikirləşirəm ki, bundan daha yaxşı oxuya bilərəm.
- Sizi orta nəsil sənətkarlar sırasına aid etmək olar. Gənc nəsildən sizlərin davamçılarını görürsünüzmü?

- Azərbaycanda gözəl səsi olan müğənnilər çoxdur. Torpağımızın yəqin suyundandır ki, bizdə həmişə istedadlar olub və bu gün də var. İndi ad çəkmək istəməzdim, ancaq gələcəyimiz üçün narahat deyiləm. Bir təəssüflənidirici hal odur ki, bu insanları üzə çıxarıb yetərincə reklam etməsələr, maddi və mənəvi dayaq olmasalar vokal sənəti gələcəkdə təhlükədə ola bilər. Axı hər adam bu sənətin həm maddi, həm də mənəvi çətinliyinə dözə bilmir.

- Şahin müəllim, sizin kimi səs sahibləri bəzən təhsillərini musiqiyə böyük önəm verən və perestij sayılan İtaliya kimi bir ölkədə davam etdirirlər. Siz nə əcəb bu yoldan istifadə etməmisiniz?
- İtaliya musiqi məktəblərini bəzən qarışıq salırlar. Orada ən yüksək səviyyəli bir musiqi akademiyası var, ona "La Skala" məktəbi deyirlər. Bir də var bizim konservatoriya kimi məktəb. Məsələn, bizim konservatoriyada iki il oxuyursan, sonrakı iki ili isə İtaliyadakı konservatoriyada təhsilini davam etdirirsən. "La Skala" isə milli və çox yüksək musiqi məktəbidir. Azərbaycandan orada mənim bildiyimə görə Bülbül, Şövkət Məmmədova, oxuyub elə orada da işləyən Anatoli-təəssüf ki, soyadını unutmuşam, son illərdə isə mənim tələbə yoldaşım olmuş Azər Zeynalov təhsil alıb. Mən isə buna ehtiyac duymuram. Bir də bizim üzeyir Hacıbəyov adına Musiqi Akademiyası heç də İtaliya Musiqi Akademiyasından geri qalmır.

- Bildiyimiz kimi bizim Qarabağın özü boyda dərdimiz də var. Hazırda ermənilərlə üzbəüz sərhədlərdə əsgərlərimiz keşikdə durublar. Belə əsgərlər qarşısında çıxışlar etmisinizmi və harada olmusunuz?

- Bir çox bölgələrdə olmuşam. Ancaq ən çox doğulduğum Goranboy rayonundakı sərhəd bölgələrində çıxış etmişəm. Axı Goranboy da düşmənlə üzbəüzdür. Orada olan hərbi hissələrdə tez-tez oluram və müxtəlif repertuarlarla əsgərlərin qarşısında çıxış edirəm. üzümü sənət dostlarıma tutub deyirəm ki, cəbhə xəttinə tez-tez getsinlər. Əsgərlərin bizlərə çox ehtiyacları var. Torpaqlarımızın işğal altında olması həmişə mənim qəlbimi ağrıdır. Allahdan yalnız bir diləyim var: tezliklə Ali Baş Komandan İlham Əliyevin rəhbərliyi ilə Qarabağ işğaldan azad olunsun və biz sənətçilər orada böyük konsert proqramı ilə çıxışlar edək.

- Qarabağda ilk olaraq hansı mahnını ifa edərdiniz?

- Düzdür, "Qarabağ şikəstəsi" mənim səs tembrimə uyğun deyil, amma yeri gələndə oxuyuram və deyilənə görə də yaxşı alınır. Axı məndə olan üç oktava açıq səsin imkanları genişdir. İşğaldan azad olunan Qarabağ torpağında, özü də Xankəndində bir "Qarabağ şikəstəsi" oxuyardımE Daha sonra "Sevgili canan"ı doğma yurdlarına qayıdan insanlara ərməğan edərdim.

- Sizin yolunuzu davam etdirən gənclərə nə tövsiyyə edərdiniz?

- Əvvəla, bir şeyi deyim. Hamı istəyir ki, maddi cəhətdən yaxşı yaşasın. Amma mən istərdim ki, sənətə yeni gələnlər hər şeydən əvvəl şəxsiyyət olsunlar, sənətdə həmişə təmiz yolu seçsinlər. Qoy mənim kimi maddi problemlər yaşasınlar. Ancaq sevdikləri, seçdikləri bu sənəti tanıtmaq üçün çalışsınlar. O bayağı mahnıları oxuyub "əməkdar", "xalq artisti" adı alanlar musiqi tarixində, insanların yaddaşında heç vaxt qalmayacaqlar. Əsl sənətkar ad verilməsə də sənəti ilə xalqın yaddaşında həmişə yaşayır. Bizim milli kökümüzə bağlı olan, qanımıza hopmuş klassik bəstəkarlarımızın xalq mahnılarının mahir ifaçısı olmaq lazımdır. üzeyir bəydən, Rəşiddən, Bülbüldən, Şövkət xanımdan və digər tanınmışlardan biz necə bəhrələnmişiksə, yeni nəsil də eləcə bəhrələnsin.

- Sizin ifanızda Dövlət Televiziya və Radiosunun Qızıl Fondunda nəsə varmı?

- Dövlət Radiosunun Qızıl Fondunda mənim ifamda 30-dan çox mahnı saxlanılır. Onların hamısı, şükürlər olsun ki, klassik bəstəkarların əsərləridir. Elə yeni gələn nəslə də bir tövsiyyəm odur ki, onların da ifalarında mahnılar yazılıb beləcə Qızıl Fondda saxlanılsın.

Təzadlar.- 2008.- 14 noyabr.- S. 8.