Salam, Şərq mədəniyyət festivalında Azərbaycan klassik musiqiləri səslənib

Avstriyada Şərq ölkələrinin musiqi, rəqs və poeziyasına həsr edilmiş "Salam, Şərq" adlı mədəniyyət festivalında Azərbaycanı əməkdar artisti Sevda Ələkbərzadə təmsil etmişdir.

Ənənəvi olaraq keçirilən bu festival hər il payız aylarında təşkil olunur. Festivalda Qafqaz ölkələrini təmsil edən musiqiçilərə xüsusi yer verilir. Xatırladım ki, bu festivalda Azərbaycanın professional sənətkarları iştirak edirlər. Məlum olduğu kimi, ötən illərdə xalq artisti Alim Qasimov və caz ustası, bəstəkar Əzizə Mustafazadə həmin festivalda ölkəmizi maraqlı musiqi proqramı ilə təmsil etmişlər.

Bu il isə festivalda çıxış Sevda Ələkbərzadəyə həvalə olunub. Festival ötən gün keçirilib. Vyanada "Sargfabrik" Mədəniyyət Mərkəzində keçirilən festivalı giriş sözü ilə "Salam, Şərq" mədəniyyət festivalının rəhbəri Norbert Ehrlix açaraq, Azərbaycan musiqi sənəti ilə bağlı iştirakçılara məlumat verərək, milli musiqimizin gözəlliyindən danışmışdı. Məhz Azərbaycan musiqisinə vurğunu olduğunu bildirmişdi. Eyni zamanda, Sevda Ələkbərzadənin məxsusi ifasında bu musiqinin Avstriya dinləyicilərinə mənəvi zövq bəxş edəcəyinə əmin olduğunu bildirmişdi.

Festivalda müğənni Azərbaycan milli musiqi sənətinə daxil olan klassik əsərləri səsləndirmişdi. Belə ki, o, "Bayatı-kürd", "Ay Lolo", "Hardasan", "Bayatı-Şiraz", "Mahur", "Mən səni araram", "Gül açdı" və digər xalq mahnıları və muğamlarımızı etno-caz stilində improvizasiya edilmiş bir şəkildə təqdim etmişdir. Konsert proqramı festival iştirakçıları tərəfindən maraqla qarşılanmışdır.

Həmin əsərlər internet vasitəsilə canlı yayımlanmışdır. Bir neçə gündən sonra isə EMAP.FM radiokanalının internet portalında konsertin səs yazısı yerləşdiriləcəkdir və musiqisevərlər istənilən vaxt həmin konserti dinləyə biləcəklər.

Səs.- 2008.- 7 noyabr.- S. 12.