AzərTAc xəbər
verir ki, görkəmli bəstəkar,
Azərbaycanın xalq
artisti, SSRİ xalq artisti, Milli Elmlər Akademiyasının
müxbir üzvü,
professor Arif Məlikovun 75 illik yubileyinə həsr edilmiş Beynəlxalq musiqi festivalı noyabrın 19-da Müslüm
Maqomayev adına Azərbaycan Dövlət Filarmoniyasında
simfonik musiqi gecəsi ilə başlanmışdır.
Baş nazirin müavini Elçin Əfəndiyev Festivalın
açılış mərasimində
demişdir ki, Arif Məlikovun musiqisi öz dərin məzmunu, obrazların çoxşaxəliyi
ilə fərqlənir.
Onun musiqisi uzaq keçmişə və müasir dövrə aid gerçəkliyin müxtəlif
cəhətlərini açıqlayır.
Qəhrəmanlıq mövzusuna,
dramatik və lirik mövzulara həsr edilmiş, zəngin emosional məzmunu ilə seçilən bu musiqidə obrazlar çox vaxt fəlsəfi-psixoloji aspektdə əks olunur.
E.Əfəndiyev
xatırlatmışdır ki, Nazim Hikmətin librettosu
əsasında yazdığı "Məhəbbət
əfsanəsi" baletinin premyerası 1961-ci ildə Rusiyada,
Leninqraddakı Mariya Teatrının səhnəsində
olmuşdur. Dərhal bədii sensasiyaya
çevrilmiş tamaşa
o vaxtdan bəri həmin teatrın səhnəsindən
düşməmişdir.
Açılış
mərasimində Arif Məlikov özü də
çıxış etmişdir. "Bu gün
mən ən xoşbəxt insanam, sevinclə qarışıq
həyəcan hissləri
keçirirəm" - deyən
bəstəkar bildirmişdir
ki, onun "Məhəbbət əfsanəsi"
baleti dünyanın yetmiş teatrının səhnəsində tamaşaya
qoyulmuşdur. Yubilyar daha
sonra demişdir: "Bu festivalın keçirilməsi təşəbbüsünü
irəli sürmüş
və onun təşkilinə kömək
etmiş Azərbaycan Prezidenti İlham Əliyevə və ölkəmizin birinci xanımı Mehriban xanım Əliyevaya təşəkkür etmək
istəyirəm".
Festivalın
açılışında Üzeyir Hacıbəyli
adına Azərbaycan Dövlət Simfonik Orkestrinin (bədii
rəhbər və baş dirijor xalq artisti Rauf Abdullayevdir)
və Azərbaycan Dövlət Xor Kapellasının (bədii
rəhbər xalq artisti Gülbacı İmanovadır)
ifasında "Vətən" simfonik poeması və 8 nömrəli
"Əbədiyyət" simfoniyası
səslənmişdir.
Sonra
bəstəkarın ulu öndər Heydər Əliyevə
həsr etdiyi "Əbədiyyət" simfoniyasının
diskinin təqdimatı olmuşdur. Azərbaycan Mədəniyyətinin Dostları
Fondunun icraçı
direktoru İbrahim Məmmədov diskin Heydər Əliyev Fondunun prezidenti Mehriban xanım Əliyevanın təşəbbüsü
ilə hazırlandığını
bildirmişdir. Arif Məlikov muğamlarımıza
böyük qayğı
göstərən Mehriban
xanıma həsr etdiyi "Muğam" kitabının da tezliklə nəşr olunacağını vurğulamışdır.
Prezidentin
İcra Aparatının Humanitar siyasət
məsələləri şöbəsinin müdiri Fatma
Abdullazadə, mədəniyyət və turizm naziri
Əbülfəz Qarayev, Azərbaycanda akkreditə edilmiş
diplomatik korpusun nümayəndələri festivalın
açılışında iştirak etmişlər.
Azərbaycan.- 2008.- 20 noyabr.- S. 6.