Mükərrəmoğlu M.

Sabah Bakıda Avropa Şurası mədəniyyət nazirlərinin konfransı öz işinə başlayır

Mədəniyyət və Turizm Nazirliyinin mətbuat xidmətindən verilən məlumatda bildirilir ki, dekabrın 2-dən 3-dək Azərbaycan Respublikasının paytaxtı Bakı şəhərində Azərbaycan hökuməti və Avropa Şurasının birgə təşkilatçılığı ilə “Mədəniyyətlərarası dialoq Avropa və onun qonşu regionlarında sülhün və davamlı inkişafın əsasıdır” mövzusunda mədəniyyət nazirlərinin konfransı keçiriləcəkdir.

Azərbaycan Respublikası beynəlxalq birliyin bərabərhüquqlu subyekti kimi dünyaya inteqrasiya siyasəti çərçivəsində Avropa Şurası ilə uğurlu əməkdaşlıq edir. Bu əməkdaşlığın dərinləşdirilməsi Azərbaycanın nüfuzunun artmasına və təşkilata üzv dövlətlərlə münasibətlərin hərtərəfli inkişafına təkan vermişdir.

Azərbaycanda mədəniyyətlərarası dialoqun inkişaf etdirilməsi istiqamətində beynəlxalq səviyyəli silsilə tədbirlər həyata keçirilir. Avropa Şurasına üzv dövlətlərin mədəniyyət nazirlərinin iştirakı ilə “Mədəniyyətlərarası dialoq Avropa və onun qonşu regionlarında davamlı inkişafın və sülhün əsasıdır” mövzusunda konfransın geosiyasi mövqe baxımından sivilizasiyalar qovuşuğunda yerləşən Azərbaycanın paytaxtı Bakı şəhərində keçirilməsinə dair təklif belə tədbirlərdən biri kimi Avropa Şurasının rəhbərliyi tərəfindən dəstəklənmişdir.

Konfransın proqramına müxtəlif tədbirlər daxildir. Gülüstan sarayında konfransın açılış mərasimi dekabrın 2-də olacaq. Həmin gün konfransda Avropa Şurasının baş katibi, Avropa Şurası Nazirlər Komitəsinin sədri, YUNESKO-nun baş direktoru çıxışlar edəcəklər.

Konfransın I sessiyasında “Ağ kitab”ın, II sessiyasında isə mədəniyyət siyasəti proqramları və təşəbbüsləri, mədəniyyətlərarası dialoq məsələləri ətrafında müzakirələr aparılacaq.

Həmin gün keçiriləcək III sessiyada isə əsas müzakirə obyekti irs və mədəniyyətlərarası dialoq olacaqdır.

Dekabrın 3-də isə konfrans nümayəndələri müzakirələrin nəticələrini nəzərdən keçirəcək və Bakı Bəyannaməsini qəbul edəcəklər.
Sonda jurnalistlər üçün mətbuat konfransı keçirilməsi də nəzərdə tutulur.

Xalq qəzeti.- 2008.- 30 noyabr.- S. 6.