Azad bir quşdum...

Səxavət Məmmədovun xatirə gecəsi

İfaçılıq sənətində dinləyicinin, ümumən xalqın qəlbinə yol tapmaq, sevilmək, əbədi-yaşarlıq qazanmaq heç də hamıya nəsib olan xoşbəxtlik deyil. Bu, Tanrının sevib-seçdiyi insanların qismətidir.

Belələri əzəldən ruhu, qanı, canı ilə sənətə bağlı olur, addımbaaddım irəliləyərək zirvələri fəth edirlər. Deyirlər ki, sənətkarı mühit, zaman yetişdirir. Əgər belə olmasaydı, ustadların yolu sonrakı nəsillərin yaradıcılığında öz davamını tapmazdı. Hər bir sənətkar özündən sonrakı nəslə bir örnəkdir. Bənzərsiz ifaçılığı ilə seçilən xanəndə Səxavət Məmmədov da belələrindən idi.

Noyabrın 3-də Müslüm Maqomayev adına Azərbaycan Dövlət Filarmoniyasında Səxavət Məmmədovun xatirə gecəsi keçirilmişdir. Gecənin aparıcısı, AMEA-nın N.Gəncəvi adına Ədəbiyyat Muzeyinin direktoru, Milli Məclisin deputatı Rafael Hüseynov bildirdi ki, bu gün səsinin işığına yığışdığımız, Ağdam rayonunun Abdal-Gülablı kəndində dünyaya göz açmış Səxavət Məmmədov səsi, avazı ilə seçilən, heç kimə bənzəməyən, öz yolu olan ifaçılardan idi. Bu bənzərsiz səs bu gün də, sabah da, hələ neçə-neçə illər sonra da öz təravətini itirməyəcək, daim dinləyicilərə doğma olacaqdır.

Cəmi 38 il ömür sürən Səxavət Məmmədov Azərbaycan musiqisini ölkəmizdən kənarda da ləyaqətlə təmsil etmişdir...

Mərhum sənətkarın ən yaddaqalan ifalarından olan "Azad bir quşdum" mahnısının videolenti alqışlarla qarşılandı.

Gecədə xalq şairi Bəxtiyar Vahabzadənin, xalq artistləri Arif Babayevin, Əlibaba Məmmədovun, İslam Rzayevin, Möhlət Müslümovun, Alim Qasımovun və başqalarının Səxavət Məmmədovla bağlı videomüsahibələri səsləndirildi.

Salona toplaşanlar xatirə gecəsinin təşkil, unudulmaz ifaçının lent yazılarının toplanıb disk halında buraxılması ilə bağlı çox böyük iş görmüş təəssübkeş soydaşımız, Ukrayna yanacaq və energetika nazirinin müavini Burzu Əliyevin çıxışını hərarətlə qarşıladılar. O, ifaçılığını, vətənpərvərliyini yüksək qiymətləndirdiyi Səxavət Məmmədovun irsinin toplanmasına on il vaxt sərf etdiyini bildirdi.

Xatirə gecəsində xalq artistləri Arif Babayev, Nəzakət Teymurova və Mənsum İbrahimovun, unudulmaz sənətkarın qardaşları Əlyar və Fehruzun, gənc ifaçıların çıxışları maraqla dinlənildi.

Gecənin iştirakçılarına Səxavət Məmmədovun "Səxavətli muğamlar" və "Səxavətli mahnı və təsniflər" seriyasından olan ikinci və üçüncü CD toplusu təqdim edilmişdir.

Respublika.- 2008.- 4 noyabr.- S. 8.