Aydınoğlu T.
Azərbaycan professional
musiqisinin banisi, dünya şöhrətli bəstəkar,
görkəmli publisist və ictimai xadim Üzeyir
Hacıbəylinin dünyasını dəyişməsindən
60 il keçir. Dahi musiqiçinin zəngin sənət irsi,
xalqımız qarşısında xidmətləri ona
ölümsüzlük qazandırdığından
ötən illərdə Üzeyir bəy sənətsevərlərin
geniş dairəsinin qəlbində
heykəlləşmişdir.
Noyabrın 23-də —
bəstəkarın xatirə günündə üzeyirsevərlər
Fəxri Xiyabana gələrək bəstəkarı dərin
ehtiramla yad etdilər, məzarı üstünə tər
çiçək dəstələri düzdülər. Anım mərasimində Ü.Hacıbəylinin
məzarı başında
həmişəyaşar sənətkar
haqqında ürək
sözləri söyləndi.
Üzeyirbəyşünas, Yazıçı Qadınlar
Cəmiyyəti İctimai
Birliyi sədrinin I müavini Səadət Qarabağlı cahanşümul
sənətkar Üzeyir
bəy Hacıbəylinin
mədəniyyət tariximizdəki
təkrarsız yerindən
danışaraq dedi ki, illər Üzeyir bəyi cismən bizdən uzaqlaşdırsa da mənən o, bizə daha da yaxınlaşır. İllər keçdikcə
Üzeyir bəy sənətinə ehtiyacımız
çoxalır. Dünya
xalqlarının da
Ü.Hacıbəyli şəxsiyyətinə
və irsinə sevgisi və ehtiramı danılmazdır.
Kanadanın Niaqara şəlaləsi
yanında keçirilən
Motsartın 250 illik yubileyinə həsr olunmuş festivalın
Ü.Hacıbəylinin “Fantaziya”sı ilə açılması, Vyanada
dünya miqyasında məşhur olan “Arşın mal alan” operettasının tamaşaya qoyulması, Avropanın mədəniyyət
mərkəzi sayılan
Avstriyanın paytaxtında dahi bəstəkarlarımızın abidəsinin açılması
buna bariz nümunədir.
Azərbaycan
Yazıçı Qadınlar Cəmiyyəti İB-nin
sədri, yazıçı Nüşabə Məmmədli
Üzeyir bəy sənətinin
həmişəyaşarlığından danışdı
və bildirdi ki, cəmiyyətin idarə heyətinin
qərarı ilə Üzeyir bəy Hacıbəyli adına
mükafat təsis edilib. Dahi Üzeyir bəyin adını daşıyan
bu mükafat ildə iki nəfərə,
yaradıcılıqda göstərilən
uğurlara görə
veriləcək.
Tədbirdə
iştirak edən görkəmli tarzən, Azərbaycan
Respublikasının xalq artisti, professor Ramiz Quliyev, Milli
Konservatoriyanın rektoru, xalq artisti, professor Siyavuş
Kərimi, Səməd Vurğunun ev-muzeyinin direktoru Aybəniz
Vurğunqızı, İqtisad Universitetinin professoru Aysəba
Əlizadə, musiqişünas, professor Zemfira Qafarova,
“Respublika” qəzetinin şöbə müdiri Mirvari
Rəhimzadə Üzeyir bəy Hacıbəylinin
bəstəkar, publisist, dramaturq, pedaqoq, musiqişünas,
ictimai xadim, xeyirxah insan kimi bənzərsizliyindən
söhbət açdılar.
Aybəniz
Vurğunqızı Üzeyir bəy və Səməd
Vurğun dostluğundan söhbət açaraq
özünün uşaqlıq xatirələrini mərasim
iştirakçılarının nəzərinə
çatdırdı, atasının dahi sənətkara sonsuz
hörmət və ehtiramından bəhs etdi.
Çıxışlarda
dönə-dönə vurğulandı ki, Üzeyir bəy
olmasaydı, mədəniyyətimiz, incəsənətimiz bu
səviyyədə olmazdı. Dahi sənətkara, Azərbaycan
xalqının böyük oğluna borcumuzu qaytarmaq
üçün hərəmiz öz sahəmizdə var
qüvvəmizlə çalışmalıyıq, onun
ölməz, zəngin irsini daim yaşatmalıyıq.
Xatirə mərasimi
böyük şairimiz Səməd Vurğunun Üzeyir
Hacıbəyliyə həsr etdiyi şeirlə sona yetdi. 60
il əvvəl Səməd Vurğun Üzeyir bəyin ölümündən doğan
sarsıntını belə
ifadə etmişdi: “Ölüm sevinməsin qoy...” Doğrudan da, dahi Üzeyir
Hacıbəyli sevərək
yaşadığından, sevilərək
öldüyündən xalqımızın
qəlbində şirin
bir xatirəyə dönərək əbədiyyət
qazanmışdır.
Xalq qəzeti.- 2008.- 26 noyabr.- S. 7.