Gənc ifaçılar arasında mutasiya problemi geniş yayılıb

 

Kişi müğənnilərdə ən təhlükəli dövr mutasiya illəri hesab olunur. Həmin dövrdə səs qorunmasa, bata bilər. Xalq artisti, Milli Konservatoriyanın kafedra müdiri Arif Babayevin qəzetimizə bildirdiyinə görə, son dövrlər belə təhlükələrlə üzləşən gənclərə tez-tez rast gəlir: "Bundan daha çox muğam ifaçıları əziyyət çəkirlər. Çünki səs dəyişən dövrdə hündürdən, zil notlarda oxumaq olmaz. Müəllim nəzarətində olan ifaçı bu dövrü təhlükəsiz ötürə bilir. Muğam ifaçıları üçün mutasiya dövrü "ölüm-qalım" deyimi qədər önəmli hesab olunur. Çünki muğamların hər birində yüsək notlar var bu yerdə səs öz imkanlarını daha qabarıq göstərə bilir".

Arif müəllimin əlavəsinə görə, Qarabağın işğalından əvvəl o, mutasiya dövründə səsi batan xanəndələrə nadir hallarda rast gələrdi: "Qarabağ torpağının yetişdirdiyi insanların əksəriyyəti gözəl səsə malik olur. Bakıya gəlib məktəb keçəndən sonra onlar bu istedadı peşəkar səviyyədə göstərə bilirlər. Amma bizim dövrdə səs batmaq problemi nadir hallarda özünü göstərirdi. İndi 2-3 uşaqdan birində səs dəyişir təhlükəli dövrü aşandan sonra bəziləri əvvəlki qaydada oxuya bilmirlər. Biz əlimizdən gələn qədər onlara yol göstərməyə çalışırıq. Amma səs ilahi vergi olduğundan onu kiməsə bəxş etmək ya almaq insanın əlində deyil".

Söhbəti zamanı xanəndə vurğuladı ki, son illər gənclər muğam sənətinə böyük maraq göstərirlər. Xalq artisti bunu sənətin inkişafı ilə yanaşı, dünya səhnəsində təbliğində böyük rol oynayacağını bildirdi: "Azərbaycanda muğam sənətini tədris edən məktəblərin sayı kifayət qədərdir. Gənclərin savadlanması üçün onlara lazımi imkanlar yaradılıb. Vacib olan budur ki, onlar düzgün istiqamətlənməyin yolunu tapsınlar savadlı xanəndə kimi yetişsinlər

 

Mövqe.- 2008.- 13-14 noyabr.- S. 13.