İbrahimova S.

 

Təranə Muradova hüquqşünas oldu

 

27 ildir səhnədən oyunlarını izlədiyimiz rəqqasə, Xalq artisti Təranə Muradovanın şəxsi həyatında maraqlı məqamlar çoxdur. Bu barədə "Kaspi" açıqlama verən rəqqasə xanım əvvəlcə bildirdi ki, 4 yaşından bu sənətlə məşğul olmağa başlayıb. Sonradan fikrini dəyişib balerina olmaq istəyən T.Muradova anasının qəti etirazından sonra yenidən milli rəqslər oynamağa davam edib. Uzun illərdən sonra həyat yoldaşı onun sənəti qarşısında bəzi qadağalar qoymaq istəyib. Lakin Təranə xanımın inadkarlığı onu bu günə kimi səhnədə saxlaya bilib: "Anamın etirazından sonra Xoreoqrafiya məktəbinə daxil oldum. Təhsilimi başa vurandan sonra özümdən yaşca çox böyük olan bir insanla ailə həyatı qurdum. Atam olmadığı üçün onu həm ata, həm dost kimi görürdüm. Etiraf edim ki, həmişə yaşıdlarımla dil tapmaqda çətinlik çəkmişəm, özümdən yaşca böyük insanlarla ünsiyyət qurmağım daha asan başa gəlirdi".

Təranə xanımın əlavəsinə görə, həyat yoldaşı onun ilk məhəbbəti olub. Onu ilk dəfə görəndə, "mənim bəxtimdir" deyib. Sonradan isə öyrənib ki, həmin insan Xalq artisti Roza Cəlilovanın qarşadıdır: "Həyat yoldaşım düşünürdü ki, ilk övladımız dünyaya gələndən sonra sənəti tərk edəcəyəm. Lakin onun istəyi heç bir rol oynamadı. Övladım həyata gələndən 5 gün sonra işə çıxdım".

Bu gün qızının atasının yolu ilə getdiyini vurğulayan Təranə xanım onun rəqqasəliyi deyil, hüquqşünaslıq sənətini seçdiyini deyir. Hətta ailəsinin hüquqa olan həvəsi Təranə xanımın hisslərinə təsir göstərib: "Mən bu il Moskvada qiyabi təhsil alaraq hüquqşünaslığı bitirdim. İlk ali təhsilimi isə Azərbaycan Dövlət Mədəniyyət İncəsənət Universitetində almışam. Bir oğlum da var, hazırda əsgərdir".

 

                  Kaspi.- 2008.- 21 noyabr.- S. 16.