Akifqızı Ş.

Hyustonda keçirilən türkdilli xalqların festivalı minlərlə tamaşaçı cəlb etmişdir

“Hyuston-Bakı” Qardaşlaşmış Şəhərlər Assosiasiyasından verilən məlumata görə, assosiasiya üzvləri Texas ştatında təşkil edilən türkdilli xalqların festivalında iştirak etmişlər. ABŞ-ın 4-cü ən böyük şəhəri hesab edilən Hyustonun mərkəzi meydanında iki gün ərzində keçirilən festival 15 min nəfərdən çox tamaşaçı cəlb etmişdir. Burada türk və Azərbaycan mədəniyyətləri ilə yanaşı, qazax, türkmən, özbək, qırğız, Bosniya və Herseqovinanın da zəngin irsi təqdim edilmişdir.

Assosiasiya üzvləri Azərbaycana həsr etdikləri köşkdə festival iştirakçılarına ölkəmiz haqda məlumat kitabçaları, suvenirlər, eləcə də Azərbaycan haqda sənədli film nümayiş etdirmişlər. Proqramın musiqi hissəsində Hyustonda Lalə Abbasovanın bədii rəhbərliyi altında yeni fəaliyyətə başlayan musiqi qrupunun, Bakıdan gələn gənc istedadlar Xədicə Əlizadə və İbrahim Fərzəliyevin vokal çıxışları, həmçinin Kamilə Həmzəyevanın ifasında milli rəqslərimiz tamaşaçıların rəğbətini qazanmışdır.

“Hyuston-Bakı” Qardaşlaşmış Şəhərlər Assosiasiyasının prezidenti İradə Axundova bildirmişdir ki, festivala gələnlər ölkəmizin mədəniyyəti və tarixinə böyük maraq göstərirdilər. Assosiasiya üzvləri vətənlərinin mədəni irsini Amerika ictimaiyyətinə çatdırmaqdan qürur hissi keçirirdilər.

Diasporun təşkilatlanmasında bu cür mədəni tədbirlərdə iştirakın əhəmiyyətini qeyd edən İradə xanım tezliklə bunun faydasını görəcəyinə inandığını bildirərək demişdir: “Kiçik toxumlardan bitən ağac bar verən kimi, bizim də mədəniyyətimizi Amerikada tanıtmaq səylərimiz müəyyən vaxtdan sonra Birləşmiş Ştatlarda Azərbaycan haqda daha dolğun və obyektiv məlumatın mövcudluğuna gətirəcəkdir.”

Xalq qəzeti.- 2008.- 9 noyabr.- S. 4.