Gürcüstanla mədəni əlaqələrin möhkəmlənməsinə daha bir töhfə

“Azərsun Holdinq”in sponsorluğu ilə “Batumi” Ansamblı Bakıda konsert verib

Noyabrın 25-də Gürcüstanın "Batumi" vokal ansamblı Üzeyir Hacıbəyov adına Bakı Musiqi Akademiyasında konsert proqramı ilə çıxış edib. Tədbir Gürcüstanın Azərbaycandakı səfirliyinin təşkilatçılığı və "Azərsun Holdinq"in maliyyə dəstəyi ilə təşkil olunub. Konsertdə xarici dövlətlərin ölkəmizdəki fövqəladə və səlahiyyətli səfirləri, dövlət və hökumət rəsmiləri, eləcə də ictimaiyyət nümayəndələri iştirak ediblər. Gürcüstanın ölkəmizdəki səfiri Nikoloz Natbiladze Azərbaycanla Gürcüstan arasında mədəni dostluq əlaqələrinin ən yüksək səviyyədə olduğunu qeyd edib. Bu əlaqələrin möhkəmlənməsinə və bunun bariz nümunəsi olan konsert proqramının təşkilində verdiyi dəstəyə görə "Azərsun Holdinq"in rəhbərliyinə dərin təşəkkürünü bildirib. Daha sonra ansamblın xormeysteri və həmçinin aparıcısı Nodar Vaşanidze çıxışında, vokalistlərin peşəkarlığından və repertuarlarına məşhur gürcü bəstəkarlarından olan Casunqa Kaxidze, Revaza Laqidze və Qeoqqiya Tsabazdenin əsərlərini də daxil etdiklərini bildirib. Məşhur "Batumi" ansamblı konsertə Azərbaycanın və Gürcüstanın himni ilə başlayıb. Rəngarəng repertuarı ilə, 13 nəfərdən ibarət olan ansambl həm xor, həm də solo mahnılarla yanaşı, Azərbaycan musiqisinə də müraciət edərək "Bəri gəl" mahnısına duet oxuyub.

Üç nöqtə.- 2008.- 27 noyabr.- S. 13.