Bibiheybət ziyarətgahı kitabı çapdan çıxmışdır

Nəşriyyat tariximizdə tamamilə yeni olan "Azərbaycanın dini-tarixi abidələri" seriyasından "Bibiheybət ziyarətgahı" kitabı çapdan çıxmışdır.

Bəşər tarixinin qədim yaşayış məskənlərindən biri, mədəniyyətlərin və sivilizasiyaların qovuşduğu məkan olan Azərbaycan müxtəlif abidələrlə, o cümlədən dini təyinatlı tikililər - məscidlər, ziyarətgahlar, kilsələr, sinaqoqlarla zəngin ölkədir: Şah Abbas, Möhsün Səlim, İmam Rza, Bibiheybət, Həzrət Zeynəb, Təzəpir məscidləri, Nardaran, Pir Həsən, Diri Baba, Mir Mövsüm Ağa, Hacı Əfəndi pirləri, Qırmızı qəsəbə sinaqoqu, Kiş, Qanzasar məbədləri və sair.

Ulu öndər Heydər Əliyev ölkəyə rəhbərlik etdiyi ilk günlərdən insan hüquq və azadlıqlarının, xüsusilə, vicdan və dini etiqad azadlığının bərqərar olmasına, milli-mənəvi dəyərlərimizin qorunmasına, insanların, əsasən də, böyüməkdə olan nəsillərin ənənələrimizə sədaqət ruhunda yetişməsinə böyük önəm verirdi. O, dini bayram günlərində xalqa müraciət edir, ölkə vətəndaşlarına təbrik ünvanlayır, tez-tez onlarla yaxından təmasda olurdu. Bütün bunlar xalqa olan diqqətin, milli mənəviyyatına bəslənən sevginin və min illər boyu formalaşmış tolerantlıq ənənələrinə hörmətin təzahürü idi.

Hələ 1998-ci ildə Bibiheybət ziyarətgahında olmuş ulu öndərimiz iftixarla demişdir: "Biz fəxr edirik ki, islam aləmində islamı təmsil edən müqəddəs yerlərdən Azərbaycanda da vardır. Bu müqəddəs yerlərdən ən əzizi bu gün bizim toplaşdığımız yer - Həzrət Hökümənin qəbri, bu qəbrin üzərində vaxtilə ucaldılmış məscidin olduğu yerdir... Bura Allah evi, islam məbədi kimi daha da geniş vüsət alıbdır, ziyarətgah olubdur.
İslam aləminin müqəddəs ziyarətgahı kimi bu yer dünyada tanınmalıdır, təbliğ olunmalıdır ki, islam tarixi bu yerin bu gününün və keçmişinin izahı ilə daha da dolğunlaşsın. Bir də ona görə ki, islam tarixinin hər bir müqəddəs yeri ümumi tarix kitablarında öz yerini tapsın. Bu işi də görmək lazımdır".

Dini Qurumlarla İş üzrə Dövlət Komitəsinin təşəbbüsü ilə yaradılmış bu seriyadan olan "Bibiheybət ziyarətgahı" kitab-albomu ümummilli liderimizin həmin tövsiyəsi istiqamətində ilk əhəmiyyətli addımdır. Kitab-albom təxminən 700 illik tarixi olan bu nadir məscidin "tərcümeyi-halı"nı mükəmməl, əhatəli şəkildə özündə əks etdirir.
Yeni nəşr xronoloji ardıcıllıqla verilmiş 8 bölmədən ibarətdir.
"1994, 21 may" bölməsində Prezident Heydər Əliyevin Qurban bayramı münasibətilə ziyarətgahda çıxışı, "1997, 23 iyul" adlı ikinci bölmədə Həzrət Məhəmməd Əleyhissalamın mövlud günündə Bakının Şıx qəsəbəsində Bibiheybət məscidinin bərpasına başlanması mərasimində çıxışı verilmişdir. Ulu öndər həmin mərasimdə məscidin tikintisini öz şəxsi himayəsinə götürdüyünü elan edərək demişdi ki, "...istəyirəm, bu gün verdiyim bəyanatı sizinlə birlikdə tezliklə həyata keçirək və qısa bir zamandan sonra bu məscidin tikilib başa çatdırılmasına nail olaq, yenidən buraya toplaşaq və onun açılış mərasimində birlikdə iştirak edək".

Üçüncü - "1998, 12 iyul" bölməsi ulu öndərimizin Bibiheybət məscid-ziyarətgah kompleksinin əsas hissəsinin açılış mərasimində iştirakından bəhs edir. O zaman Qafqaz Müsəlmanları İdarəsinin sədri Şeyxülislam Allahşükür Paşazadə dövlət başçısını ziyarətgahla tanış edərək demişdi ki, məhz Prezidentin birbaşa qayğısı və diqqəti sayəsində burada əsas işlər cəmi dörd ay müddətində yerinə yetirilmişdir.
"1999, 28 mart" bölməsində Heydər Əliyevin müqəddəs Qurban bayramı mərasimində yenidən məscidə gəlməsi ilə bağlı material toplanmışdır.
2003-cü ildə xalqın böyük dəstəyi ilə Prezident seçilmiş İlham Əliyev ulu öndərin siyasətini uğurla davam etdirərək, maddi-mədəniyyət abidələrimizin, müqəddəs ocaqlarımızın bərpası ilə bağlı bir sıra fərman və sərəncamlar vermişdir. Bunların sırasında Bibiheybət məscid kompleksinin genişləndirilməsi də öz əksini tapmışdır. Dövlətimizin başçısı iki dəfə buraya gəlmiş, tikinti işləri barədə konkret tapşırıqlar vermişdir.

Kitab-albomun "2005, 31 oktyabr" və "2007, 20 dekabr" bölmələrində bu barədə ətraflı söhbət açılmışdır.
2008-ci il iyulun 12-si Bibiheybət məscidinin, ümumiyyətlə, respublikamızın tarixində əlamətdar bir günə çevrildi - ziyarətgah kompleksi bütövlükdə əsaslı yenidənqurma və geniş tikinti işlərindən sonra dindarların istifadəsinə verildi. Azərbaycan Prezidenti İlham Əliyev xanımı Mehriban Əliyeva, qızları Leyla və Arzu ilə birlikdə kompleksin təntənəli açılış mərasiminə gəldi. Dövlətimizin başçısı burada görülmüş işlərlə tanış oldu, mərasimdə dərin məzmunlu nitq söylədi.

Nəşrin "2008, 12 iyul" bölməsində həmin nitqin tam mətni, Qafqaz Müsəlmanları İdarəsinin sədri Şeyxülislam Allahşükür Paşazadənin, Bakı və Xəzəryanı bölgə yeparxiyasının yepiskopu Aleksandrın, Dağ Yəhudiləri dini icmasının sədri Semyon İxiilovun, Bakıdakı Roma katolik kilsəsinin başçısı Yan Çaplanın çıxışları verilmişdir.

Kitab-albom dövlət komitəsinin sədri Hidayət Orucovun "Bibiheybət ziyarətgahı: tarixi və bu günü" adlı tarixi oçerki ilə tamamlanır. Oçerkdə islam dünyası üçün çox əhəmiyyətli olan bu qədim məscidin tarixindən, orada uyuyan müqəddəslərdən, zaman-zaman hakimiyyət dairələrinin, ayrı-ayrı tarixi şəxsiyyətlərin məscidə olan münasibətlərindən, sovet rejiminin mənfur ateist siyasətindən maraqlı, tutarlı dəlillərlə söhbət açılır. Müəllif xüsusi vurğulayır ki, "...bəzən böyük şəxsiyyətlərin başladıqları əsaslı islahatlar, möhtəşəm quruculuq işləri layiqli varisin olmaması səbəbindən yarımçıq qalır, cəmiyyətdə ictimai-siyasi böhran yaranır. Bu rakursdan yanaşdıqda, Azərbaycan xalqını xoşbəxt xalq, Heydər Əliyevi isə xoşbəxt lider hesab etmək olar. Çünki onun əsasını qoyduğu dövlət quruculuğu prosesi İlham Əliyevin təşəbbüskarlığı, işgüzarlığı, gərgin əməyi, zəngin təcrübəsi, diplomatik səriştəsi, yüksək intellekti və mədəniyyəti sayəsində yarımçıq qalmadı".
Nəfis tərtibatla, yüksək poliqrafik icrada buraxılmış kitab-albomda materiallar Azərbaycan, ingilis və rus dillərində verilmişdir. Nəşrin buraxılışına məsul Hidayət Orucovdur. Kitab-albomun hazırlanmasında AzərTAc-ın materiallarından istifadə edilmişdir.

Azərbaycan.- 2008.- 30 oktyabr.- S. 4.