Əliyev Ə.

Parisdə Avropa Şurası mədəniyyət nazirlərinin Bakıda keçiriləcək konfransına hazırlıq məsələsi müzakirə edilmişdir

Oktyabrın 27-də Avropa Şurasının (AŞ) Parisdəki ofisində qurumun mədəniyyətnazirlərinin Bakıda keçiriləcək konfransına hazırlıq məsələsi müzakirə edilmişdir.

Azərbaycan nümayəndə heyətinin rəhbəri, mədəniyyət nazirinin müavini Sevda Məmmədəliyeva AzərTAc-ın xüsusi müxbirinə müsahibəsində yığıncağın yekunlarını şərh etmişdir. Nazir müavini demişdir:

- Dekabrın 2-3-də Azərbaycan paytaxtında Avropa Şurası mədəniyyət nazirlərinin mədəniyyətlərarası dialoqa həsr olunmuş beynəlxalq konfransı keçiriləcəkdir. Ölkəmizin həyatında mühüm hadisəyə çevriləcək bu mötəbər tədbirə hazırlıqla əlaqədar Parisdə işçi qrupunun sonuncu yığıncağı olmuşdur. Burada konfransda qəbul ediləcək sənədlər, eyni zamanda, tədbirin təşkili ilə bağlı praktiki məsələlər geniş müzakirə olunmuşdur.

Yığıncaqda Avropa Şurasının mədəniyyət, mədəni və təbii irs üzrə direktoru Pobert Palmer, katibliyin əməkdaşı Katrin Merkl, həmçinin AŞ-nin mədəniyyət üzrə rəhbər komitəsinin sədri Dayana Dayonova, sədr müavini və büro üzvləri iştirak etmişlər.

Bakıda keçiriləcək konfrans zamanı qəbul olunacaq bəyannamə və onun statusu ətrafında geniş fikir mübadiləsi aparılmışdır. Təbii ki, bununla bağlı bütün sənədlər müzakirə edildikdən sonra Avropa Şurasının üzvü olan dövlətlərə göndəriləcəkdir. Eyni zamanda bu sənədlər rəy verilmək üçün konfransa dəvət olunacaq qonşu region ölkələrinə də təqdim ediləcək və müzakirələr aparılacaqdır. Ölkəmizdə keçiriləcək beynəlxalq konfransda yalnız Avropa Şurasına üzv ölkələr deyil, eyni zamanda, müşahidəçi statusuna malik beş dövlət, habelə qonşu regionlardan 12 ölkə iştirak edəcəkdir. Konfransda daha çox islam ölkələrinin iştirakı nəzərdə tutulmuşdur.

Artıq 20 ölkənin mədəniyyət naziri, 12 dövlətin nazir müavini, AŞ-nin baş katibi Terri Devis, İSESKO, ALEKSO və TüRKSOY təşkilatlarının baş katibləri konfransda iştiraka razılıqlarını vermişlər. Bir sıra ölkələrin nümayəndələri isə iştirakla bağlı cavablarını noyabrın ilk həftəsində göndərəcəklərini bildirmişlər.

Bakıda keçiriləcək konfrans həm Avropa ölkələri, həm də qonşu regionlar arasında mədəniyyətlərarası dialoq mövzusunda əməkdaşlıq məsələsinə həsr olunacaqdır. Bu əməkdaşlıqda Azərbaycan tərəfinin əsas məqsədi Bakı prosesinin əsasını qoymaq, başqa sözlə, Şərq və Qərb sivilizasiyalarının yaxınlaşmasında, inkişaf etdirilməsində ölkəmizin körpü rolu oynamasına nail olmaqdır.

Azərbaycan.- 2008.- 28 oktyabr.- S. 4.