Ə.Qarayev TÜRKSOY Daimi Şurasının müvəqqəti əlaqələndiricisi seçilmişdir

Xəbər verildiyi kimi, oktyabrın 25-26-da Qırğızıstanın paytaxtı Bişkekdə TÜRKSOY (Türk mədəniyyət və incəsənətinin birgə inkişafı üzrə Təşkilat) Daimi Şurasının XXV iclası keçirmişdir.

Tədbirdə Azərbaycanı Mədəniyyət və Turizm Nazirliyinin Beynəlxalq əlaqələr və mədəniyyət proqramları şöbəsinin beynəlxalq təşkilatlarla əməkdaşlıq və proqramlar sektorunun müdiri Yaşar Hüseynli və nəşriyyat sektorunun müdiri Çingiz Əlioğlu təmsil etmişlər.

Mədəniyyət və Turizm Nazirliyindən bildirmişlər ki, TÜRKSOY Daimi Şurasının XXV İclasının gedişində təşkilatın fəaliyyəti və inkişaf perspektivləri məsələlərinə baxılmışdır.

Daimi Şurada TÜRKSOY-un "Keçən dövrün fəaliyyəti üzrə hesabat" və "Maliyyə hesabatı" yekdilliklə qəbul edilmiş və təşkilatın Baş Direktorluğunun son zamanlardakı uğurlu fəaliyyəti qeyd olunmuşdur.

Təşkilatın YUNESKO, İSESKO, İRSİKA kimi beynəlxalq təşkilatlar və Türk Dünyasının Bələdiyyə İttifaqı və Avrasiya Yazıçılar İttifaqı kimi ictimai təşkilatlarla əməkdaşlığa dair fəaliyyəti dəstəklənmiş, həmin qurumlarla birgə tədbirlərin keçirilməsinin vacibliyi vurğulanmışdır. İclasda Çingiz Aytmatova 15000 ABŞ dolları dəyərində TÜRKSOY III Beynəlxalq Mükafatının verilməsi (ölümündən sonra) haqqında qərar qəbul olunmuş və mükafat dahi yazıçının xanımına təqdim edilmişdir. TÜRKSOY rəssamlarının Şimali Kiprdə keçirilmiş 10-cu görüşünün nəticələrinə əsasən rəssam Adılbəy Bayterekov (Qırğızıstan) təsviri incəsənət sahəsində (1000 ABŞ dolları məbləğində) TÜRKSOY-un xüsusi mükafatına layiq görülmüşdür.

Daimi Şura Almatı şəhərində "TÜRKSOY-Qazaxıstan dəstəkləmə Fondu"nun yaradılmasını müsbət qarşılamış, onun türkdilli xalqların mədəniyyət və incəsənətinə töhfələr verdiyini qeyd etmiş və digər iştirakçı dövlətlərdə də analoji fondların yaradılmasının mümkünlüyünü vurğulamışdır.

Daimi Şura təşkilatın 2009-cu il üzrə Fəaliyyət Proqramını qəbul etmişdir. Proqrama "TÜRKSOY mədəni turizm Proqramı"nın işlənib hazırlanması və həyata keçirilməsi; "TÜRKSOY mədəni irsinin Siyahısı"nın tərtib olunması; "TÜRKSOY xalqlarının milli musiqi alətlərinin təbliği" adlı layihənin hazırlanması və həyata keçirilməsi və "TÜRKSOY xalqlarının kulinariya sənəti" kataloqunun tərtibi ilə bağlı Azərbaycanın tərəfindən təklif olunan bir sıra uzunmüddətli layihələr də daxil edilmişdir. Rəsmi tədbirlər, konfranslar, konsertlər, sərgilər və digər çoxsaylı mədəni tədbirləri özündə əks etdirən Fəaliyyət Proqramı "Bakının 2009-cu il üçün İslam Mədəniyyətinin paytaxtı kimi qeyd olunması" ilə əlaqədar Tədbirlər Planının layihəsini də əhatə edir.

Azərbaycanın təşkilat çərçivəsində fəal rolu nəzərə alınaraq TÜRKSOY Daimi Şurasının XXVI iclasının 2009-cu ildə Bakıda keçirilməsi qərara alınmış, Mədəniyyət və Turizm naziri vəzifəsini icra edən Əbülfəs Qarayev yekdilliklə təşkilatın Daimi Şurasının Müvəqqəti əlaqələndiricisi seçilmişdir. Bununla əlaqədar TÜRKSOY-un simvol və bayrağı Azərbaycan nürnayəndə heyətinə təqdim olunmuşdur.

Respublika.- 2008.- 30 oktyabr.- S. 4.