Gənc rəssamın əsərləri sərgiləndi

Sərgidə 51 qrafika və rəngkarlıq əsərləri təqdim olundu

Dünən İçərişəhərdəki "Abşeron" Rəsm Qalereyasında gənc rəssam Aynurə Haşımovanın yaradıcılığına həsr edilmiş sərgi keçirildi. Fərdi sərgi Bakı Gənclər və İdman Baş İdarəsinin təşəbbüsü ilə təşkil olunmuşdu.

Sərgini giriş sözü ilə rəsm qalereyasının direktoru Eldəniz İbrahimov açaraq, sənətsevərlərin diqqətinə Aynurənin 51 qrafika və rəngkarlıq əsərlərinin təqdim olunduğunu bildirdi. Eldəniz İbrahimov gənc rəssamın yaradıcılığı haqqında iştirakçılara məlumat verərək, sərginin ekspozisiyasına maraqlı tablo və rəsmlərin daxil olduğunu bildirdi. Sərgidə, ilk növbədə, janr müxtəlifliyi diqqəti cəlb edir. Burada müxtəlif janrlarda olan əsərlərə "Avtoportret", "Portret", "Bahar", "Sübh çağı", "İçərişəhər", "Cığır", "Yol", "Meyvələrlə natürmort", "Qladioluslar", "Büllur vaza ilə natürmort", "Bənövşəyi güllər", eləcə də, çoxfiqurlu kompozisiyalara rast gəlinir.

   Eldəniz İbrahimov onu bildirdi ki, Aynurə xanımın yaradıcılığında motivlər də müxtəlifdir. Bu motivləri üç qismə ayırmaq olar. Əgər birinci qisim uşaq və yeniyetmələrə daha çox xasdırsa, ikinci qisim gəncliyə xas olan mövzularla bağlıdır":Aynurəyə gənclikdən ayrılmağa, peşəkar orta nəsil rəssamları sırasına qovuşmağa mane olan iki səbəb vardır. Birinci səbəb odur ki, müəllif üçün doğma olan, daha çox gəncliyə xas olan mövzulardan ayrılmaq çətindir. İkincisi də odur ki, Aynurə Haşımova Uşaq Rəsm Qalereyasının direktorudur, həm də rəsm müəllimidir. Vaxtının çox hissəsi istedadlı uşaqların yaradıcılığına, maraqlı sərgilərin təşkilinə həsr olunur. Bu iki dünya arasında A.Haşımovanın körpü quracağı an, inanırıq ki, uzaqda deyil. Hələlik, gənc rəssam onu əhatə edən gerçəkliklərdən maraqlı motivlər seçir".

Sərginin açılış mərasimində Azərbaycan Rəssamlar İttifaqının sədr müavini Ağaəli İbrahimov, Bakı şəhər Gənclər və İdman Baş İdarəsinin rəis müavini Nəcəf Novruzov və b. çıxış edərək Aynurə xanımın yaradıcılıq yolundan, onun fərdi cizgilərindən iştirakçılara söz açdılar. Qeyd olundu ki, gənc rəssam fərdi üslubu ilə daim diqqətdə olmuş, yaratdığı nümunələri ilə həm nağıllar aləminin, həm də bizi əhatə edən gerçəkliyin ən gözəl məqamlarını təqdim etmişdir. Təbii ki, sənət yolunun başlanğıcında olan Aynurə xanım əsil sənətə qovuşmaq üçün hələ çox səylər göstərməli olacaqdır.

   Sərginini açılış mərasimində çıxışlar sona yetdikdən sonra "Abşeron" Rəsm Qalereyasının sərgi salonları iştirakçıların ixtiyarına verildi. Divarboyu asılmış tabloların hər birində rəssamın yaradıcılıq təxəyyülünün məhsulu olan əsərlər diqqəti cəlb etdi. "Kafe musiqiçisi", "İçərişəhər", "Yol", "Plenerdə", "Cığır", "Sufi dərviş", "Müqəddəs ruhlar", "Meyvələrlə natürmort", "Alma və çiçəklərlə natürmort", "Qladioluslar" və s. əsərlərində gənc rəssamın naturadan çəkməyə üstünlük verməsi diqqətdən yayınmadı.

Əsərlərdən açıq-aydın hiss olunurdu ki, Aynurə xanım imkan tapan kimi, Azərbaycanın gözəl guşələrinə səyahətlər edir. Gördüyü gözəl mənzərələri fırçanın köməyi ilə kətan üzərinə köçürür. Bəzən gənc rəssamın mistik mövzulara bir qədər aludə olduğunu əsərlərindən sezilirdi. Bu kompozisiyaları bir simvol kimi, öncəgörmə kimi qəbul etmək olar.

Qeyd edim ki, gənc rəssam Aynurə Haşımovanın fərdi sərgisi oktyabrın 26-na kimi davam edəcək

Səs.- 2008.- 24 oktyabr.- S. 13.