Günay

Rəhilə Məmmədzadənin 25 illik fəaliyyəti qeyd olunub

Ötən gün Tofiq İsmayılov adına Uşaq və Gənclər Yaradıcılıq Birliyində ömrünün yarıdan çoxunu uşaqlara sərf edən rəssam-pedaqoq Rəhilə Məmmədzadənin 25 illik pedaqoji fəaliyyəti ilə bağlı tədbir keçirildi. Tədbirdə çıxış edən sənətşünas Bədayə Ramazanova bildirdi ki, hər kəsi bugünkü tədbirə cəlb edən və toplayan Rəhilə xanımın yaradıcılığının işığıdır. 25 illik fəaliyyəti ərzində həqiqətən də Rəhilə xanım bir pedoqoq kimi işinə məsuliyyətlə və tələbkarlıqla yanaşan bir müəllimə olub".

Burda sərgilənən rəsmlərə baxdıqda tamamilə biri-birinə bənzəməyən rəsmlər gördüyünü deyən Rəhilə xanımın sənət dostu Ağəli İbrahimov vurğuladı ki, başqa gənc rəssamların yaradıcılığında hardasa müəlliminin dəsti-xətti hiss edilir, amma Rəhilə xanımın tələbələrinin işləri tam fərqlidir, biri-birinə bənzərlik yoxdur. Rəhilə xanımın pedoqoji fəaliyyətindən danışan xalq rəssamı Arif Hüseynov vurğuladı ki, hər yaxşı rəssam, yaxşı müəllim və yaxud da hər yaxşı müəllim də yaxşı rəssam ola bilmir: "Amma Rəhilə xanımda xoşbəxtlikdən bu cəhətlər hər ikisi birləşib".

İncəsənət Gimnaziyasının direktoru Maya Rəsulova belə günlərdə insanın həm sevindiyini, həm də kədərləndiyini söyləyərək bildirdi ki, insan sevinir ona görə ki, neçə illik işinin bəhrəsi göz önündə olur, kədərlənir ona görə ki,ötüb-keçən 25 ilə bir də qayıtmayacaq.

Sonda isə Rəhilə xanım çıxış edərək bildirdi ki, Tanrıdan çox razıdır ki, ona belə bir tale yazıb:" Bu 25 illik müəllimlik fəaliyyətim çox rəngarəng keçib. Uşaqlardan hər birinin ürəyimdə xüsusi yeri var. Onların hərəsinə fərdi yanaşmam olub. Bu illər ərzində uşaqlara rəssamlıq sənətinin incəliklərini öyrədib, onlara Vətənimizin, ətraf mühitin gözəlliklərini qiymətləndirərək, canlandırmağı öyrətmişəm. Məhz bu səbəbdən onlarla yurdumuzun gözəl guşələrinə ekskursiyalar keçirmişəm. İllər boyu məhz bunların nəticəsində şagirdlərimin işlərinin uğurlu bəhrəsini görmüşəm".

Xatırladaq ki, R.Məmmədovanın çoxsaylı tələbələri müxtəlif illərdə beynəlxalq festivallarda yer tutub və mükafat qazanıblar - 1995-ci ildə Toma Məmmədovanın (6 yaş) rəsmi Azərbaycan Beynəlxalq Əməliyyat şirkəti üçün keçirilən emblem müsabiqəsinə daxil edilmiş 1000-dən artıq əsərdən birincisi yeri tutub. O, bir çox müsabiqələrdə qalib olmuş və 1999-cu ildə Azərbaycan istedadlı uşaqlarını təmsil etmək üçün Birləşmiş Ştatlara yeganə nümayəndə kimi göndərilib, 1997-ci ildə "Moskva 850" müsabiqəsində Lalə Fətəliyeva, Orxan Bağırov və Natella İsayeva "Xüsusi diplom"la təltif olunublar. 1998-ci ildə uzaq İspaniyada Şirin Haqverdibəyova ( 7 yaş) 2-ci yerə layiq görülüb, 1999-cu ildə "Kitabi Dədə 1300" müsabiqəsində Lalə Fətəliyeva 1-ci yer, Nərmin Abdullayeva 1-ci yer, 1999-ci il BTM-nin "Əhali gününə" həsr olunmuş sərgi müsabiqəsində Aşurova Ayan 1-ci yer, Bağırov Orxan 2-ci yerə layiq görülüblər və s. Uşaqlar sonda öz rəqsləri, rəsmləri və moda nümayişi ilə müəllimlərini təbrik etdilər və Rəhilə xanımın neçə illik əməyini dəyərləndirərək ona diplomlar təqdim olundu.

Paritet.- 2008.- 28-29 oktyabr.- S. 12.