2010-cu il Mədəniyyətlərin beynəlxalq yaxınlaşması ili elan edilib

Bu günlərdə Astanada islam ölkələrinin və Qərb dövlətlərinin iştirakı ilə "Ümumi dünya: müxtəlifliklərdən inkişafa doğru" konfransı keçirilib. Həmin konfransda Qazaxıstan Respublikasının təşəbbüsü ilə BMT-nin Baş Assambleyası 2010-cu ili Mədəniyyətlərin Beynəlxalq Yaxınlaşması İli elan edib. Forumda dünyanın 60 ölkəsinin və beynəlxalq təşkilatların nümayəndələri iştirak edib. Qeyd edək ki, "Müsəlman dünyası və Qərb" formatında keçən dialoqun təşəbbüskarı Qazaxıstan Respublikasıdır. Konfransı Qazaxıstan prezidenti Nursultan Nazarbayev açaraq, planetin dörddə bir hissəsini əhatə edən islam dünyasının iştirakı olmadan XXI yüzilliyin qlobal problemlərinin həllinin mümkün olmadığını iştirakçıların nəzərinə çatdırıb. İslam Konfransı Təşkilatının baş katibi Ekmaləddin Ehsanoğlu isə islam dünyasının terrorçu adı ilə damğalanmasından və terrordan daha çox islam ölkələrinin əziyyət çəkməsindən söz açıb. O, mədəniyyətlərin tanınması, etnik-dini müxtəlifliyin qarşılığında xristian və müsəlman dünyasının dialoqları çərçivəsində dünyanın harmoniyasının qorunmasının mümkünlüyünü qeyd edib. Rusiyanın xarici işlər naziri Sergey Lavrov isə İslam Konfransı Təşkilatının gördüyü işləri bəyəndiyini deyərək, Qafqazda baş verən son hadisələrdən sonra heç bir problemin güc yolu ilə həllini tapmadığını, beynəlxalq öhdəliklərdən kənara çıxan təqdirdə isə, ancaq problemlərin yarandığını bildirdi. Misir, Qətər, Səudiyyə Ərəbistanı və İordaniyanın liderləri də "Müsəlman dünyası və Qərb" dialoqu ideyasının "Alyansların Sivilizasiyası" təşəbbüsünü dəstəklədiklərini bildiriblər.

Səs.- 2008.- 22 oktyabr.- S. 13.