Ağaoğlu T.

 

Yeri görünür

 

Muzey Mərkəzində tanınmış kinorejissor, əməkdar incəsənt xadimi, respublika Dövlət mükafatı laureatı Arif Babayevin 80 illik yubileyi qeyd edilmişdir. Tədbir iştirakçılarında qürur hissi aşkar duyulurdu. Mərhumun qardaşı, televiziya rejissoru, xalq artisti Vasif Babayev dedi:

- Arif Bakıda, İçərişəhərdə dünyaya göz açmışdı. Ömrünün sonuna kimi hər gün ora gedər, lal-dinməz ətrafa baxar, əlini divarlara çəkib mənəvi təskinlik tapardı. O, "Gün keçdi" filmində doğma ünvana epizodik olsa da məhəbbətini bildirmişdi. Qız qalası ətrafında çəkilişlər apararkən uşaq kimi ağlamışdı. Amma aktyorların ifalarını, baxışlarını məharətlə lentə almışdı. Qardaşım kino sənətini canı qədər sevirdi. Dövlət Televiziyasının inkişaf etməsində Arifin xidmətləri olmuşdur. Ötən əsrin 60- illərinin sonlarından "Azərbaycanfilm" kinostudiyasında çalışmışdır. O zaman qanunlar, qadağalar qədər sərt olsa da, yaradıcılığa da meyil, imkan vardı. Kinostudiyanın direktoru, son dərəcə humanist şəxsiyyət, aktyor-rejissor Adil İsgəndərov Arifin sərbəst, mükəmməl yaradıcılığı üçün qayğı göstərmişdi. Gördüyü hörmətdən, göstərilən etimadı doğrultmasından o, ömrünün sonuna kimi "Azərbaycanfilm" kinostudiyasında işlədi.

Dövlət Film Fondunun direktoru, əməkdar incəsənət xadimi Cəmil Quliyev də unudulmaz rejissor, özünə müəllim bildiyi A.Babayevi ehtiramla xatırladı:

- Kino sənətinə marağımı, həvəsimi artıran məhz istedadlı rejissor Arif müəllim olmuşdur. Onun 1975-ci ildə çəkdiyi "Alma almaya bənzər" bədii filmində Kərimov rolunda oynamışam. Rəhmətlik həddən artıq diqqətcil, qayğıkeş insan idi. Çəkilişlər zamanı yorulardım, haldan düşərdim. O, yaxınlaşıb, xoş sözlərlə könlümü alar, rolu oynamağa həvəsləndirərdi. Arif müəllim 10-dan artıq sənədli tamaşaçıların maraqla baxdığı "İnsan məskən salır", "Uşaqlığın son gecəsi", "Gün keçdi", "Ömrün ilk saatı", "Arxadan vurulan zərbə", "Birisi gün gecəyarısı" bədii filmlərinə, "Zirvə" kinonovellasına quruluş vermişdir. İnanıram ki, kino sənətimizin inkişafında onun fəaliyyəti, xidmətləri heç vaxt unudulmayacaq. Bu gün Arif müəllimin yeri görünür.

Tədbirdə tələbəsi, yetirməsi olan Arif Babayev haqqında pedaqoq, rejissor, aktyor Mehdi Məmmədovun vaxtı ilə dediyi bu fikirlər səsləndi: "İllər ötüb keçəcək. Çox sənətkarlarımız kimi, o da unudulmayacaq". Sonda kino xadiminin həyat yaradıcılığından yadigar qalan fotoların sərgisinə baxış oldu.

Azərbaycan.- 2008.- 18 oktyabr.- S. 8.