Quliyeva Z.

 

DAK-ın Bakı nümayəndəliyi dünya azərbaycanlılarının birliyinə həsr edilən tədbir keçirib

 

Dünya Azərbaycanlıları Konqresinin Azərbaycan nümayəndəliyi Muğam Teatrında Ramazan bayramı münasibətilə və dünya azərbaycanlılarının birliyinə həsr edilən tədbir keçirdi. DAK-ın Mədəniyyət İncəsənət Mərkəzinin rəhbəri, əməkdar artist Ağalar Bayramovun aparıcılıq etdiyi gecənin ahəngində bir həsrət niskili duyulurdu.

DAK-ın həmsədri Paşa Qəlbinur, DAK-ın fəxri prezidenti Qulamrza Səbri Təbrizi, xalq artisti Habil Əliyev, şair Musa Yaqub və başqaları çıxış edərək Azərbaycan ədəbiyyatında daima müraciət edilən Cənub həsrətindən, ayrılıq çayı sayılan Araza qoşulan nəğmələrdən, şeirlərdən danışdılar. Azərbaycan şair yazıçılarının mənsub olduğu müxtəlif nəsillərin mərhələ-mərhələ bu mövzuda qələmə aldıqları əsərlərin bədii siqlətindən, dəyərindən söz açıldı.

DAK-ın Azərbaycan nümayəndəliyinin rəhbəri, tədbirin təşkilatçısı Nadir Orucov dünya azərbaycanlılarının birliyini zəruri edən amillərdən, ulu öndər Heydər Əliyevin diaspor hərəkatına müsbət təsirindən söz açdı. "Bu gün 50 milyonluq dünya azərbaycanlıları məhz Heydər Əliyevin müdrikliyinin və qüdrətinin sayəsində sarsılmaz gücə çevriliblər. Bu gün iqtisadi inkişafın dinamikasına görə dünyada lider dövlət olan Azərbaycan Respublikası 50 milyon soydaşımızın harada yaşamasından asılı olmayaraq hər birinin vətəni, mənəvi qürur mənbəyidir. Bu birlik ulu öndərin müəyyənləşdirdiyi azərbaycançılıq ideologiyası dünya azərbaycanlılarını daim millətin dövlətin mənafeyi üçün səfərbər edəcək, gələcək nəsillər üçün təməl istinadgah olacaq. Ulu öndərin qeyd etdiyi kimi, bu gün Azərbaycan dünyaya bir günəş kimi doğur. Bu günəşin zərrələri bugünkü inkişafımız, qüdrətimiz, müstəqilliyimiz yüksələn rifahımızdır" - deyən Nadir Orucov bu tədbirin ülvi məqsədlərə xidmət etdiyini söylədi.

Əməkdar artist Ağa Cəbrayıl Abbasəliyevin rəhbərlik etdiyi xalq çalğı alətləri ansamblının müşayiəti ilə gecənin ruhuna uyğun mahnılar səsləndirildi. Əməkdar artistlər Yaqut Abdullayeva, Nuriyyə Hüseynova, Ruhəngiz Allahverdiyeva, gənc muğam ifaçıları Babək Niftəliyev, Ehtiram Hüseynov, Şahin İsmayılov başqaları xalq mahnılarını, Azərbaycan muğamlarını şövqlə ifa etdilər. Dünya azərbaycanlılarının həmrəyliyinə, birliyinə xidmət məramı ilə təşkil edilmiş gecə xalq şairi Məmməd Arazın "Ayağa dur, Azərbaycan" şeiri ilə başa çatdı.

Azərbaycan
.- 2008.- 4 oktyabr.- S. 6.