Lalə

Nazir Azərbaycanın mövqeyini açıqladı

"Biz işğal altında olan ərazilərə və Ermənistana səfər edəcək missiyanın eyni tərkibdə olmasını istəyirik"

"Avropa Şurası (AŞ) Parlament Assambleyasının Mədəniyyət, Mədəni və Təbii İrs Direktorluğunun missiyası Azərbaycana səfər etməyi planlaşdırır. Biz ölkəmizə, işğal altında olan ərazilərə və Ermənistana səfər edəcək missiyanın eyni tərkibdə olmasını istəyirik".

Bu barədə jurnalistlərlə söhbətində Mədəniyyət və Turizm naziri Əbülfəs Qarayev məlumat verdi. Nazir Ermənistanda İslam mədəni abidələrinin dağıdılmasına dair Azərbaycan tərəfdə faktların mövcud olduğunu dedi: "Hazırda tərəflərə alternativ missiya variantları təklif olunur. Bu, missiyanın müxtəlif vaxtlarda hər bir regiona səfər etməsi deməkdir". Bu variantın Azərbaycanı qane etmədiyini deyən Ə.Qarayev missıyanın tərkibində dəyişiklik olacağı təqdirdə, müxtəlif fikirlərin meydana çıxa biləcəyini bildirdi. Onun sözlərinə görə, Ermənistanın səfərlə bağlı hər dəfə yeni təklif irəli sürməsi missiyanın həyata keçirilməsi üçün problemlər yaradır: "Missiyanın baş çəkəcəyi abidələrin siyahısı hələ dəqiqləşdirilir. Azərbaycan AŞ Parlament Assambleyasının Mədəniyyət, Mədəni və Təbii İrs Direktorluğunun missiyasını qəbul etməyə hazır olsa da, Ermənistan tərəfi prosesi uzadır".

Mərkəz.- 2008.- 7 oktyabr.- S. 9.