Cəvahir

Türkiyədə “Azərbaycan kinosu-110” fotosərgisi keçirilib

Həftəsonu Antalyada TÜRKSOY tərəfindən 45-ci «Altın Portakal» və 4-cü Avrasiya kinofestivalları cərçivəsində “Azərbaycan kinosu-110” adlı fotosərginin rəsmi açılış mərasimi olub. Bu barədə qəzetimizə Mədəniyyət və Turizm Nazirliyinin mətbuat katibi Zöhrə Əliyeva məlumat verib. Tədbirin açılışında TÜRKSOY-un baş direktoru Dusen Kaseinov, Türkiyə Mədəniyyət və Turizm Nazirliyinin Antalya şəhər müdiri İbrahim Acar və «Altın Portakal» Festivalının təşkilatçıları iştirak ediblər. Antalya muzeyində təşkil olunmuş sərgidə Azərbaycan filmlərini əks etdirən 60 foto nümayiş etdirilib. İki gün davam edən festival dünən başa çatıb.

Qeyd edək ki, sərgi Azərbaycan Mədəniyyət və Turizm Nazirliyi tərəfindən hazırlanıb və təmənnasız olaraq TÜRKSOY-a hədiyyə edilib.

Gələcəkdə fotolar TÜRKSOY-un arxivində Azərbaycan mədəniyyəti materiallarının sırasına daxil ediləcək.

Mərkəz.- 2008.- 21 oktyabr.- S. 11.