Oqtay Mirqasımov: Arzu etməyi bacarmaq, təmiz niyyətli olmaq lazımdır

AzərTAc xəbər verir ki, oktyabrın 3- Azərbaycan kinoteatrında xalq artisti, rejissor Oqtay Mirqasımovun quruluşunda lentə alınmış Günaydın, mələyim bədii filmi jurnalistlərə təqdim olunmuşdur.

Film göstərildikdən sonra O.Mirqasımov mətbuat konfransı keçirmişdir.

O, filmin çəkiliş prosesindən, bu ekran əsərində tamaşaçılara aşılamaq istədiyi ideyadan söz aşmışdır. Bildirmişdir ki, filmin ideyası Qarabağ müharibəsində ərini itirmiş, körpəsi ilə tək qalmış, lakin dəyanətini itirməmiş bir qadının sözlərindən sonra yaranmışdır. Həmin qadın demişdir: Mən bilirəm ki, ərim artıq qayıdan deyil. Amma mənin onun qayıtmasına bərabər bir arzum var - ərimin qəhrəmancasına həlak olduğu bu müharibədə biz qələbə çalaq.

O.Mirqasımov demişdir ki, ilk baxışda filmin süjeti adama qəribə gəlir. Ən başlıcası, arzu etməyi bacarmaq, saf niyyətli olmaq lazımdır. Şəxsən mən bunu bacarıram.

Bu filmdə müəllif yalnız müharibə qəhrəmanı obrazı yaratmaqla qalmır, eyni zamanda tamaşaçılarına xatırladır ki, aramızda belə arzularla yaşayanlar az deyil. Onlar mələklərə inanmırlar, amma insanın daxilində yüksək ruhun təcəssümünə şübhə etmirlər.

Filmdə xalq artistləri Fuad Poladov, Telman Adıgözəlov, Bəsti Cəfərova və əməkdar artist Ayan Mirqasımova çəkilmişlər.

Yeni ekran əsərinə musiqini Elmar Fell yazmışdır.

Filmin premyerası oktyabrın 4-də olacaqdır.

İki sahil.- 2008.- 4 oktyabr.- S. 16.