ATİB-in dəstəyi ilə simfonik konsert keçirildi

ATİB-in dəstəyi ilə M.Maqomayev adına Azərbaycan Dövlət Filarmoniyasında skripka ustası, Filarmoniya İstanbul Orkestrinin baş dirijoru Hakan Şensoyun müşayiəti ilə Qara Qarayev adına Dövlət Kamera Orkestrinin konserti keçirildi. Solistlər respublika müsabiqələr laureatı Fəridə Rüstəmova və respublikanın əməkdar artisti Arzu Mustafayev idilər.

Konsertdə M.Bekenin "Ayşenin fantaziyası", A.Vivaldinin "İlin fəsilləri", "Yay", P.Sarasetenin "Əndəlis" romansı, H.Şensoyun "Səhnələr", Frank Britişn mövzusu üzərində variasiyalar səsləndirilmişdir.

Xatırladaq ki, Hakan Şensoy İtaliya, Polşa, Rumıniya, İsveç, İngiltərə, Meksika və Türkiyədə bir çox orkestr konsertində solist olaraq iştirak etmişdir. Dəfələrlə ən yüksək müsiqi mükafatlarına layiq görülmüş Hakan Şensoy bir çox radio və televiziya proqramlarında prodüsser və şərhçi olaraq çalışmış, türk bəstəkarlarının əsərlərini şərh etmişdir. Buna bariz nümunə olaraq, Yalçın Turanın skripka və piano üçün "Üç vals" və bəstəkarın Şensoya ithaf etdiyi skripka və kamera solistləri üçün "Oyun havaları" adlı əsəri, Münir Nurettin Bekenin skripka üçün "Keçmişə rəqs" əsərini ilk dəfə səsləndirmişdir.

ATİB hər zaman ölkələrimiz arasındakı mədəni və sosial əlaqələrin inkişafına, o cümlədən Azərbaycanın mədəni irsinin və sahib olduğu potensialın həm Türkiyədə, həm də adı çəkilən musiqiçilər vasitəsi ilə dünyanın digər ölkələrində tanınmasına töhfə verməklə, eyni zamanda iki ölkənin mədəni irsinin nə dərəcədə oxşar olduğunu sübut edir.

Azərbaycan.- 2008.- 11 oktyabr.- S. 7.