Bakıda XIII uşaq muğam festivalı başa catmışdır

Oktyabrın 22-də Rəşid Behbudov adına Dövlət Mahnı Teatrında Gənclər və İdman Nazirliyinin dəstəyi ilə "Kainat" Gənclik Mərkəzinin keçirdiyi ənənəvi XIII uşaq muğam festivalına yekun vurulmuşdur.

Tədbirdə muğam ustaları, Bakıdakı xarici səfirliklərin nümayəndələri, ictimaiyyət və mədəniyyət xadimləri iştirak etmişlər.

May ayında Ağdamın Quzanlı qəsəbəsində start götürmüş, Hacıqabul, İsmayıllı, Abşeron rayonlarının, Sumqayıt və Bakı şəhərlərinin ərazisini əhatə edən festival 16 yaşınadək gənc istedadlar arasında keçirilmişdir.

XIII uşaq muğam festivalının seçim kampaniyasının artıq sona çatdığını bildirən "Kainat" Gənclik Mərkəzinin rəhbəri, festivalın təşkilatçısı Rahib Rəsulzadə demişdir ki, son zamanlar ölkəmizdə qədim muğam irsimizin öyrədilməsi və təbliği ilə bağlı yüksək səviyyədə geniş işlər aparılmışdır. Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın yüksək diqqəti və qayğısı sayəsində muğam sənətinin qorunması, təbliği və inkişaf etdirilməsi sahəsində həyata keçirilən layihələr öz bəhrəsini verməkdədir. İndi Azərbaycanın hər yerində muğama maraq daha da artmışdır və Təşkilat Komitəsi seçim zamanı bunun bir daha şahidi olmuşdur.

Sonra festivalın 14 nəfər qalibinin yekun konserti olmuşdur. Onları Baba Salahov adına xalq çalğı alətləri ansamblı müşayiət etmişdir.

Festivalda iştirak edən gənc ifaçıların hər birinə diplom, 3 nəfərə isə həvəsləndirici mükafat təqdim edilmişdir.

Birinci yerə Orxan Əbilov layiq görülmüşdür.

Misir Ərəb Respublikasının Bakıdakı Mədəniyyət Mərkəzinin nümayəndəsi qaliblərə qiymətli hədiyyələr vermişdir.

Respublika.- 2008.- 23 oktyabr.- S. 8.