Daşdəmirli Ə.

Məşhur Mehmandarovlar nəslinin davamçısı

Deyirlər ki, hər kəsin öz zirvəsi var. Hələ kiçik yaşlarından hamı öz istedadı, bacarığı ilə bu zirvəni fəth etməyə çalışır. Kim ki, bu zirvəni vaxtında fəth edir, o, öz arzusuna, səadətinə qovuşur. Elə haqqında söhbət açmaq istədiyimiz Mustafa kimi...

Əvvəla onu qeyd edək ki, Mustafa əslən Şuşadan olan məşhur Mehmandarovlar nəslindəndir. İlk azərbaycanlı ali təhsilli hüquqşünas Sadıq bəy Mehmandarov, Azərbaycan Demokratik Respublikasının hərbi naziri, general-leytenant Səməd bəy Mehmandarov, həkim Əbdülkərim bəy Mehmandarov və bu soyadın onlarca daşıyıcısı Azərbaycanın tarixində şərəfli yer tutmuşlar.

Mustafa Mehmandarov 1992-ci il iyunun 2-də Bakıda dünyaya göz açıb. O, 1998-ci ildə Bakıdakı 23 nömrəli orta məktəbin birinci sinfinə daxil olub. Həmin ildə də Yasamal rayonundakı 22 nömrəli uşaq musiqi məktəbinin skripka sinfinə qəbul edilib. 1999-cu ildə Ü.Hacıbəyov adına Bakı Musiqi Akademiyası nəzdində Orta İxtisas Musiqi Məktəbi studiyasının ikinci sinfinə keçirilib. Hazırda həmin məktəbin səkkizinci, orta məktəbin isə onuncu sinfində oxuyur. Musiqidən ixtisas müəllimi Zəhra Quliyevadır.

Mustafanın müxtəlif müsabiqələrdəki uğurları onun parlaq gələcəyindən, istedadlı bir şagird olduğundan xəbər verir.

O, 2003-cü ildə Nazim Əliverdibəyovun xatirəsinə həsr olunmuş gənc ifaçıların ümumşəhər müsabiqəsində diploma layiq görülüb. Elə həmin ildə Bakıda ən yaxşı ifaya görə rus cəmiyyəti tərəfindən keçirilmiş rus klassik xalq musiqisi və rəqslərinin "Rodniki duşi" adlı baxış müsabiqəsində III yerə, 2005 və 2006-cı illərdə keçirilən eyni adlı müsabiqələrdə də iştirak edərək II yerə, sonra isə I yerə layiq görülüb, laureat adını qazanıb, diplomlar alıb.

2005-ci ildə o, daha bir müsabiqədə - yəhudi cəmiyyətinin Novruz bayramı münasibətilə Bakıda keçirdiyi gənc ifaçıların müsabiqəsində I yerə çıxıb.

Təhsil aldığı Orta ixtisas Musiqi Məktəbi studiyasının 25 illik yubileyinə həsr olunmuş uşaq musiqi festivalının qalibi olan Mustafa I yer üzrə laureat adına layiq görülüb.

Mustafa ötən ilin yayında Moskvaya gedib. Suzdalda skripka üzrə bir müddət təcrübə keçib və diplom alıb.

O, Nazim Əliverdibəyov adına gənc ifaçıların IV ümumşəhər müsabiqəsinin qalibi adını alaraq bəstəkar Azər Rzayevin imzası ilə təsdiqlənən diploma layiq görülüb.

Mustafa həm də Gənclər kamera orkestrində fəaliyyət göstərir. On beş yaşlı Mustafanın tərbiyəsində atası Adil, anası Zülfiyyə ilə yanaşı, nənəsi də xüsusi rol oynayıb. Mustafanın uğurlarına sevinən müəllimləri, şagird dostları, qohumları onun konsertlərinə sonsuz həvəslə gedir, səhnədəki çıxışlarını böyük maraqla izləyirlər.

Biz də öz zirvəsini fəth etmək, öz istedadı, zəhməti ilə səadətinə qovuşmaq istəyən Mehmandarovlar nəslinin layiqli davamçısı olan Mustafa Mehmandarova seçdiyi bu şərəfli yolda uğurlar diləyirik. Arzu edirik ki, onun skripkada ifa etdiyi Azərbaycan milli musiqisinin sədaları xarici ölkələrin ən məşhur konsert salonlarından gəlsin.

Azərbaycan müəllimi.- 2008.- 17 oktyabr.- S. 6.