Orucov E.

Mədəniyyət İlham Əliyev siyasətinin mühüm tərkib hissəsidir

Oktyabrın 19-da Mərkəzi Seçki Kommisiyası növbəti iclasında prezident seçkilərinə yekun vurmuşdur. Həmin iclasda bir daha bildirmişdir ki, komissiyanın müəyyən etdiyi nəticələrə görə İlham Heydər oğlu Əliyev seçkilərdə iştirak etmiş seçicilərin 88,73 faizinin səsini qazanaraq böyük üstünlüklə qalib gəlmişdir.

İlham Əliyevin ötən beş ildə milli-mənəvi dəyərlərimizin qorunmasında, mədəniyyətimizin bütün sahələrinin inkişafında hədsiz xidmətləri olmuşdur. Qloballaşan dünyada milli-mənəvi dəyərlərin qorunması olduqca çətin prosesdir, buna dövlət rəhbərinin müdaxiləsi olduqca vacibdir. Bu gün fəxrlə deyə bilərik ki, Azərbaycanın mədəniyyəti, mənəvi dəyərləri gələcək nəsillər üçün qorunur, inkişaf etdirilir və dünyaya tanıtdırılır.

Cənab İlham Əliyevin ötən beş ildə mədəniyyətimizin inkişafına göstərdiyi qayğının nəticəsidir ki, bu gün YUNESKO Azərbaycan mədəniyyətinə böyük diqqət göstərir. Bizim İçərişəhər, Şirvanşahlar Dövlət Qoruq Kompleksi, Qobustan həmin təşkilatın mədəni irs siyahısına daxil edilmişdir. Muğam sənətimiz isə YUNESKO-nun qeyri-maddi irs siyahısına salınmışdır. Bunların mahiyyəti odur ki, Azərbaycanın qədim mədəniyyətinə dünyanın nüfuzlu təşkilatları diqqət göstərir, onu bəşəri dəyər kimi qeydə alır. Möhtərəm Prezidentimiz İlham Əliyevin ötən beş ildə Azərbaycan xalqı qarşısındakı xidmətləri olduqca böyükdür. Söz yox ki, ölkəmizin iqtisadi cəhətdən qüdrətli dövlətə çevrilməsi, Qafqazda liderliyi ələ alması, bir neçə beynəlxalq layihələrin reallaşması, regionların sosial iqtisadi inkişafında əldə olunan uğurlar, sosial sferada qazanılan uğurlar bu nailiyyətlərin bariz nümunəsidir. Amma bütün bunlarla yanaşı, mədəniyyət, incəsənət sahələrində baş verən yeniliklər onu deməyə əsas verir ki, cənab Prezidentimiz bu sahəni heç vaxt diqqətdən kənarda qoymamışdır. Cənab Prezident Azərbaycan Rəssamlar İttifaqının 65 illik yubileyi münasibətilə keçirilən tədbirdəki nitqində demişdir: “...Bütövlükdə ölkənin mədəni həyatına çox böyük diqqət göstərilməlidir. Mən Prezident kimi çalışıram ki, bu sahə diqqətdən kənarda qalmasın. Bu sahəyə daim diqqət verilməlidir və son müddət ərzində Azərbaycanın iqtisadi imkanları artdıqca, əlbəttə, biz bunu daha da sürətlə həyata keçiririk”. Doğrudan da, 2003-cü ildən sonra bu sahəyə dair möhtərəm Prezidentimizin yüzlərlə sərəncamı olmuşdur.
Bir faktı diqqətə çatdırmaq istəyirəm. Ötən beş ildə iki ölkədə (Rusiya, Almaniya) Azərbaycan ili, Azərbaycanda Rusiya ili, 7 xarici ölkədə "Azərbaycan mədəniyyəti günləri" Azərbaycanda isə 100-dən artıq belə tədbirlər keçirilmişdir. Mədəniyyət abidələrimiz bir-birinin ardınca təmir olunub yenidən istifadəyə verilmişdir. 2004-cü ildə Filarmoniya, 2007-ci ildə A. Şaiq adına Kukla Teatrı, 2008-ci ildə Rus Dram Teatrı müasir üslubda yenidən qurularaq tamaşaçıların ixtiyarına verilmişdir.
Dahi bəstəkar Üzeyir Hacıbəyovun 120 illik yubileyinin təntənə ilə keçirilməsi ölkəmizin mədəni həyatında böyük hadisəyə çevrildi. Heydər Əliyev adına Sarayın, Azərbaycan Milli Akademik Dram Teatrının, Gənc Tamaşaçılar Teatrının təmirə başlaması mədəniyyətimizin gələcək inkişafının təmin olunmasına yönəldilən tədbirlərdir. Tarix Muzeyinin, Ədəbiyyat Muzeyinin təmiri də bu dövrdə həyata keçirilən mühüm tədbirlərdən idi. Xüsusilə tarixi abidə kimi qorunan Tarix Muzeyinin əsaslı təmiri cənab Prezidentimizin xüsusi diqqət mərkəzində olmuşdur. Cənab Prezident demişdir: “Mən Tarix Muzeyinin bərpası ilə əlaqədar verilmiş qərarı özümə mənəvi bir borc hesab edirəm”.

Məhz İlham Əliyevin hakimiyyəti dövründə Muğam Mərkəzinin, Xalça Muzeyinin tikintisinə başlanmışdır. Bunların çox unikal mədəniyyət mərkəzləri olacağı şübhəsizdir. Eyni zamanda İstiqlal Muzeyi, Müasir İncəsənət Muzeyi tikintilərinə başlanması ilə əlaqədar da məhz İlham Əliyev sərəncamlar vermişdir. Bu yaxınlarda ölkədə Neft Muzeyinin və Etnoqrafiya muzeylərinin açılışı mədəni həyatımızın yeni hadisələridir.

Azərbaycan Respublikası Prezidenti tərəfindən 2004-2008-ci illərdə muzey işinin inkişafı ilə bağlı 6 sərəncam imzalanmışdır. Bu dövrdə 5 tarix-diyarşünaslıq muzeyi, 47 Heydər Əliyev Muzeyi yaradılmışdır.

Muğam müsabiqələrinin keçirilməsi də milli-mənəvi dəyərlərimizə göstərilən qayğının bariz nümunəsidir. Mədəniyyət abidələrinin qoruq kimi mühafizə edilməsi məsələsi də diqqət mərkəzində olmuşdur. Ölkə Prezidentinin sərəncamı ilə 2007-ci ildə Abşeron rayonu “Yanar dağ” dövlət tarixi-mədəniyyət və təbiət, “Xınalıq” Dövlət tarixi-memarlıq və etnoqrafiya, “Keşikçidağ” Dövlət Tarixi Mədəniyyət, “Atəşgah” məbədi Dövlət tarixi-memarlıq qoruqları yaradılmışdır.

Kino sənətinin, kitabxana işinin inkişafı da diqqətdən yayınmamışdır. Məndə olan məlumata görə, ötən beş ildə Azərbaycanda 13 tammetrajlı, 11 qısametrajlı bədii film istehsal edilmişdir, 22 sənədli, 6 animasiya filmi çəkilmişdir. Dövlət Film Fondu üçün yeni bina tikilmiş, istifadə üçün hazırdır.

Mədəniyyətin mühüm sahələrindən olan rəssamlıq sənəti də bu dövrdə xeyli inkişaf etmişdir. Bu yaxınlarda Azərbaycan Dövlət Rəssamlıq Akademiyasının yeni korpusu istifadəyə verilmiş, orada rəsm qalereyası üçün xüsusi şərait yaradılmışdır.

2006-cı il 27 dekabr tarixdə cənab İlham Əliyevin Azərbaycan Rəssamlar İttifaqının yubileyində iştirakı və orada geniş və məzmunlu nitq söyləməsi rəssamlarımızın sənətinə verilən yüksək qiymətdir. Cənab Prezident həmin nitqində demişdir: “Rəssamları, heykəltəraşları narahat edən, maraqlandıran məsələlərdən biri də emalatxana ilə təminatdır. Mən buna bir az daha da geniş kontekstdən baxıram. Əlbəttə ki, emalatxanalar olmalıdır və olacaqdır”. Bu, əlbəttə, bütün rəssamların ürəyindən olan sözlər idi. Ümummilli lider Heydər Əliyev rəssamların emalatxanalarını özəlləşdirmək imkanı yaratmışdı. Ancaq bu gün bir qrup rəssamlarımız var ki, onların emalatxanaları da yaxşı vəziyyətdə deyil, ya da ümumiyyətlə yoxdur.

Çox hörmətli Prezidentimiz dünya rəssamlarının da əsərlərinin saxlandığı Azərbaycan Dövlət İncəsənət Muzeyinin təmir edilməsi barədə də sərəncam vermişdir. Buraya dünyanın hər yerindən qonaqlar gəlir və bu muzeyin müasir tələblərə cavab verəcək səviyyədə təmir olunması çox vacibdir.

Azərbaycan öz yüksək tarixi-mədəni abidələri ilə həmişə diqqət mərkəzində olmuşdur. İndi nüfuzlu beynəlxalq təşkilatlar ölkəmizin mədəni nailiyyətlərini öyrənir, onun təbliğinə xüsusi diqqət yetirirlər.
Avropa Şurasına daxil olan ölkələrin, İslam Konfransı ölkələrinin mədəniyyət nazirlərinin bu yaxınlarda Bakıda keçiriləcək konfransları bunu bir daha təsdiq edir. İslam Konfransı Təşkilatı mədəniyyət nazirlərinin konfransında 2009-cu ildə Bakı şəhəri İslam Mədəniyyətinin Paytaxtı, elan olunmuşdur. Elə 2009-cu ildə İslam Konfransı Təşkilatı mədəniyyət nazirlərinin VI konfransı da Bakıda keçiriləcək.

Bütün bunlar çox hörmətli Prezidentimizin mədəniyyət sahəsində həyata keçirdiyi siyasət nəticəsində mümkün olmuşdur. Ona görə də mədəniyyət xadimləri məhz İlham Əliyevin yenidən Prezident seçilməsinə öz səslərini vermişlər.

Xalq qəzeti.- 2008.- 22 oktyabr.- S. 5.