Samirə

“Bakıda atamı sevənlər çoxdur”

Olqa Rostropoviç: "Vaşinqtonda belə əhvalı tapmazsınız"

Dünyaşöhrətli həmyerlimiz Mstislav Rostropoviçin qızı Olqa Rostropoviç "www.svobodanews.ru" saytına müsahibə verib. Müxbirin "Mstislav Leopoldoviçin Bakı haqqında hansı xatirələri bölüşdüyünü" xəbər almasına zəmanəmizin klassik musiqiçisinin qızı belə cavab verib:

   - Atam bu barədə müfəssəl danışmırdı. Çünki buna vaxtı yox idi. Təbii ki, o, Bakını çox sevirdi, bu şəhərdə keçirdiyi bir neçə ili böyük bəxtiyarlıq hissi ilə xatırlayırdı. Və əlbəttə ki, Azərbaycanın mərhum prezidenti Heydər Əliyev atamdan gizli onun əvvəllər yaşadığı evi Leopold və Mstislav Rostropoviçlərin ev-muzeyinə çevirəndə atam bunu heç bir dəyərə sığmayan hədiyyə kimi qəbul etdi. Atasını çox erkən, 14 yaşında ikən itirdiyindən bu jest onun üçün lap əziz idi. Təsirlənməyə isə doğrudan kifayət qədər səbəb var idi. Demək olar ki, eyni vaxtda həm ev-muzeyi, həm də Leopold və Mstislav Rostropoviçlərin adını daşıyan küçə və 21 nömrəli Musiqi Məktəbi Bakının mərkəzi hissəsini bəzəməyə başlamışdı.
Bu şəhər atamın taleyində, həyatında həmişə böyük önəmə malik olub. Ağır xəstə olduğu vaxtlarda 2 ay onunla birlikdə xəstəxanada qaldım. Hətta bu dövrdə də atam Bakıya can atırdı ki, yenicə bəstələnmiş operanı ifa etsin. (Söhbət Firəngiz Əlizadənin Nərgiz Paşayevanın librettosu əsasında bəstələdiyi "İntizar" operasından gedir - red.)
Təəssüf ki, ömür vəfa etmədi. Amma atamın təklifi ilə ərsəyə gəlmiş bu operanın sayəsində Bakıda festival keçirmək ideyası yarandı. Atam məndən təkidlə xahiş etmişdi ki, belə bir festivalı təşkil edim. O istəyirdi ki, Bakı musiqi mərkəzinə çevrilsin.
   - Bəs harda festival təşkil etmək çətindir - Bakıda, yoxsa Vaşinqtonda?
   - Yəqin ki, Bakıda bu vəzifəni yerinə yetirmək asandır. Çünki çoxlu sayda insanların həvəsi bir sıra çətinlikləri, bürokratik sədləri aşmaq iqtidarına malikdir. Vaşinqtonda belə əhvalı tapmazsınız. Orda hər şeyi əvvəlcədən yoluna qoymaq məcburiyyətindəsən, Həmkarlar İttifaqı fəaliyyət göstərdiyi üçün müqavilələrə imza atmalısan. Bakıda isə atamı sevənlər, hörmət edənlər çoxdur. Ona görə də çətinlik yarana bilməz.
   - Əgər Vaşinqtonda və Bakıda yolla gedən insanları saxlayıb Mstislav Rostropoviçin kim olduğunu soruşsaq, sizcə, hansı şəhərdə bu suala dürüst cavab almaq mümkündür?
   - Yəqin ki, hər iki şəhərdə. Bir fərqlə ki, Bakıda atamı tanımayan demək olar ki, yoxdur.
M.L.Rostropoviç 17 il müddətində Vaşinqtonda Milli Simfonik Orkestrə rəhbərlik edib. Burda hər il oktyabrın 12-dən 16-dək "Mstislav Rostropoviçə həsr olunur" adlı festival keçirilir. Bakı festivalının zamanı isə dekabr ayına təsadüf edir. Gənc musiqiçilərə yardım fondunun direktoru olan Olqa Rostropoviç 2010-cu ildən etibarən Moskvada atasının şərəfinə müsabiqə təşkil etmək niyyətindədir. M.Rostropoviçin musiqi karyerasının keçdiyi yolu bir daha əks etdirmək və yeni istedadları aşkarlamaq məqsədilə müsabiqə dirijorluq, violonçel, fortepiano, kamera musiqisi və kompozisiya nominasiyaları üzrə keçiriləcək. Münsiflər heyəti isə bütün bu sahələrin, janrların, növlərin mütəxəssislərindən təşkil ediləcək.

Həftə içi.- 2008.- 15 oktyabr.- S. 8.