Azərpaşa Nemətov: "Müslüm Maqomayevi doğma vətənində

dəfn etmək qərarı çox müdrik addımdır"

Teatr Xadimləri İttifaqının sədri, xalq artisti Azərpaşa Nemətov AzərTAc-ın müxbirinə məxsusi müsahibəsində demişdir:

- Bülbül adına orta-ixtisas musiqi məktəbində SSRİ xalq artisti, dünya şöhrətli müğənni Müslüm Maqomayevlə birgə oxumuşam. Mən ikinci, o isə yeddinci sinifdə oxuyurduq. Həmişə Yeni il şənliklərində Müslüm ispan musiqisi ifa edərdi. Biz çox heyranlıqla ona qulaq asardıq. Sonralar Müslüm dünya şöhrətli müğənni oldu. Hələ SSRİ döyründə Müslüm 31 yaşında sovet dövrünün ən yüksək - SSRİ xalq artisti adına layiq görüldü. Buna nail olmaq hər istedadlı gəncin hünəri deyildi. Həmin dövrdə o, ən populyar estrada ifaçılarından biri idi. Mübaliğəsiz deyə bilərəm ki, Müslüm həqiqətən milyonların sevimlisi idi. Pərəstişkarları onu sevir, o da onlara eyni məhəbbətlə cavab verirdi. Bütün qastrollarında müğənni dəfələrlə çoxsaylı tamaşaçıların qarşısında mehmanxanaların balkonlarından çıxış edirdi. Konsertləri həmişə stadionlarda açıq hava şəraitində keçirdi. Müslüm keçmiş SSRİ-də Fransada yüksək səviyyədə konsert vermiş ilk müğənni idi.

Ulu öndər Heydər Əliyevin təklifi ilə onun yazdığı "Azərbaycan" mahnısı bütün dünyada Azərbaycanı tanıtdı. O, çox qeyrətli, mərd bir Azərbaycan oğlu idi. Mən çox fəxr edirəm ki, Azərbaycan xalqı da onu sevir. Çox sevindirici haldır ki, bu gün Azərbaycan hökuməti onu belə uca tutur. O, Azərbaycana məxsus idi, Azərbaycan torpağının oğlu idi. Müslüm Maqomayevi doğma vətənində dəfn etmək qərarı çox müdrik addımdır.

Respublika.- 2008.- 29 oktyabr.- S. 6.