SSRİ xalq artisti,
ümumittifaq və beynəlxalq müsabiqələr və
festivallar laureatı Müslüm Məhəmməd oğlu
Maqomayev uzun sürən ağır xəstəlikdən sonra
Moskvada 67 yaşında vəfat etmişdir.
Müslüm Maqomayev
1942-ci il avqustun 17-də Bakıda anadan olmuşdur. Azərbaycan Dövlət Konservatoriyasının
nəzdindəki musiqi
məktəbinin fortepiano
və kompozisiya sinfində oxumuş,
1968-ci ildə Konservatoriyada
Ş.Məmmədovanın sinfində təhsil almışdır. 1962-ci ildə
Kremlin qurultaylar sarayında keçirilən
Azərbaycan incəsənəti
festivalından sonra böyük şöhrət
qazanmış, bir il sonra 21 yaşında Moskvada Çaykovski adına konsert salonunda solo konsertlə çıxış etmişdir.
1963-cü ildə gənc
müğənni M.F.Axundov adına Opera və Balet
Teatrında solist kimi fəaliyyətə başlayır,
1964–1965-ci illərdə Milanda “La Skala” teatrında
təcrübə keçir. 60-cı illərdə gənc Müslüm ecazkar səsi ilə nəinki Sovet İttifaqında, eləcə də artıq bütün dünyada böyük şöhrət qazanmışdı.
Parisin “Olimpiya” teatrındakı çıxışları
(1966 və 1969-cu illərdə)
Azərbaycan müğənnisi
Müslüm Maqomayevi
estrada sənətinin
canlı əfsanəsinə çevirdi.
SSRİ-nin və
dünyanın ən böyük şəhərlərinin
məşhur salonlarında onu hərarətlə
alqışlayır, ifasını nəfəs
dərmədən dinləyirdilər. Müslüm
öz gözəl ifası və səhnə mədəniyyəti
ilə epoxal sənət və ifaçılıq məktəbi
oldu. Müslümün opera səhnəsində
ifa etdiyi Fiqaro (“Seviliya bərbəri”, C.Rossini) partiyası ona ölməzlik qazandırdı.
”Koroğlu", “Şah
İsmayıl”, “Toska”
(C.Puççini), “Aleko”
(S.Raxmaninov) və digər operalardan ariyalar onun ifasında
dünya opera sənətinə dəyərli
töhfələr oldu.
1969-cu ildə M.Maqomayev
Sopot festivalında 1-ci mükafata, Kannda isə “Qızıl
val”a layiq görüldü.
1973-cü ildə
Müslüm 31 yaşında SSRİ xalq artisti adı
aldı. 1975–89-cu illərdə böyük sənətkar
özünün yaratdığı Azərbaycan Dövlət
Estrada-Simfonik Orkestrinin bədii rəhbəri kimi
fəaliyyət göstərdi və dünyanın
müxtəlif guşələrində qastrol
səfərlərində oldu.
Müslümün
konsert repertuarında 600-dən çox əsər (romanslar,
klassik və estrada mahnıları) var idi. İstedadlı müğənni
“Nizami”, “Oxuyur Müslüm Maqomayev” və “Moskva notlarda” filmlərində çəkilmişdir. O, 20-dən
çox mahnının,
bir neçə filmin musiqisinin müəllifidir. Müəllifi
olduğu “Mavi əbədiyyət”, “Təntənəli
mahnı”, “Mənim Azərbaycanım” mahnıları
sənətkarlıq baxımından
bu gün də yüksək dəyərləndirilir.
Müslüm Maqomayevin
ölümü milyonlarla insanı dərindən
kədərləndirdi. Dünya şöhrətli müğənni,
SSRİ xalq artisti İosif Kobzon öz böyük dostunun itkisini ürək ağrısı
ilə qarşılayaraq
demişdir: “Sonuncu əlliilliyin ən parlaq səhifəsi bağlandı. Bizdə ondan istedadlı adam yox idi.
Çox təəssüf,
bizim onu itirməyimiz sadəcə
olaraq dəhşətdir.
Yeganə təskinliyimiz
ondan bizə qalan lent yazılarıdır.
Bunlar onu tanıyanlar üçün
Müslüm Maqomayevin
böyük istedadının
xatirəsi, onu tanımayanlar üçün
onun dahiliyinin sübutu, kəşfi olacaq”.
Böyük sənətkar,
bəstəkar, gözəl
insan Müslüm Maqomayevlə vida mərasimi Moskvada Estrada Teatrında keçiriləcək.
Qəbri nurla dolsun! Allah rəhmət
eləsin!
Xalq qəzeti.- 2008.- 26 oktyabr.- S. 3.