Moskva Müslüm Maqomayevlə vidalaşdı

Moskvada SSRI xalq artisti Müslüm Maqomayevlə vida mərasimi keçirilib. Ümümrusiya Azərbaycan Konqresinin Moskva bölməsinin rəhbəri Ilqar Hacıyevin APA-ya verdiyi məlumata görə, vida mərasimi mərhumun dəfələrlə çıxış etdiyi Çaykovski adına Konsert Zalında onun ifa etdiyi mahnıların sədası altında keçirilib. Mərasim Bakı vaxtı ilə saat 11.00-da başlayıb. Saat 13.00-da isə rəsmi hissə olub. Müslüm Maqomayevin yeganə qızı Marina həyat yoldaşı Aleksandr Kozlovski ilə birlikdə atasının dəfn mərasimində iştirak etmək üçün dünən ABŞ-dan Bakıya gəlib. Marina atası ilə Moskvada keçirilən vida mərasimində iştirak etmək istəsə də, Rusiyaya viza ala bilməyib. Bu səbəbdən də o, ABŞ-dan birbaşa Bakıya gəlib. Marinanın 7 yaşlı oğlu Müslümün (Alan) isə babasının ölümündən xəbəri yoxdur. M.Maqomayevin xanımı Tamara Sinyavskaya bu xəbəri uşağa çatdırmağı lazım bilməyib. Kiçik Müslüm dünya şöhrətli babasını çox sevirmiş, tez-tez onlara qonaq gəlirmiş. T.Sinyavskaya hesab edir ki, babasının ölüm xəbəri uşağa pis təsir edə bilər. Amerikada qızı ilə yaşayan M.Maqomayevin birinci həyat yoldaşı Ofeliya da dəfn mərasimində iştirak etmək istədə də, nəvəsi ilə qalmaq məcburiyyətindədir. O, müsahibəsində M. Maqomayevin hazırkı həyat yoldaşı T.Sinyavskaya ilə çox yaxşı münasibətlərinin olduğunu deyib: “Müslümlə məni bağlayan şeylər çox uzaqda qalıb. Tamara mənim ərimi əlimdən almayıb, onlar biz boşanandan sonra tanış olublar. Sinyavskaya Marinanı öz qızı kimi sevir, qızım nəvəmlə tez-tez atasının yanına gedirdi".

Azadlıq.- 2008.- 29 oktyabr.- S. 15.